Eyl(Puntland Post) Gudoomiye ku xigeenka koowaad ee Baarlamaanka Puntland Cabdi xamiid Shiikh Cabdi ayaa sheegay inuu ku faraxsan yahay hir galinta shirkadda Dalxiiska iyo deegaanka Magool oo uu hir galiyay gudoomiyihii hore Mudug Mudane Maxamed Yuusuf Jaamac (Tigey).
Cabdi xamiid Shiikh Cabdi iyo wafdi uu horkacayo oo isigu jira,xildhibaano,xubno ka tirsan gollaha xukumadda iyo siyaasiyiin hore ayaa dadwayne aad u faro badna oo dalxiis u yimi degmada Eyl kala qayb qaatay farxadda munaasibadda ciida.
Waxa uu sheegay masuulkan inuu aad ugu faraxsan yahay shirkadda Magool oo uu ku tilmaamay inay wax baddan oo horumarinta dalka iyo soo bandhiga bilicda Puntland ka qayb qaadanayso, agaasimaha shirkadda Magool ayuu ku ammaanay tilaabada wanaagsan ee uu qaaday.
Masuuliyiin kala duwna oo dowladda ka tirsan gaar ahaan mamulka degmada Eyl ayaa sheegay inay ku faraxsan yihiin in Eyl ay noqoto goobtii ugu horaysey ee dalxiis loo yimaado lagana hir galiyo xafiiska shirkadda Magool, waxa kale ay sheegeen inay ku faraxsan yihiin dalxiisayaasha oo ka kala yimi meelo ka baxsan magalada Garowe iney waqti wanaagsan ku qaataan xaruntan.
Qaar ka mid ah dalxiisayaasha ayaa sheegay inay ku faraxsan yihiin in waqti wanaagsan ku qaataan degmada Taariikhiga ah ee Eyl, waxa kale ay cadeeyeen inay tahay arrin lagu farxo in dadka lagu dhiiri galiyo dalkooda inay ku dalxiisaan.
Mamulaha shirkadda dalxiiska Magool Maxamed Yuusuf Jaamac (Tigey) ayaa sheegay hal ku dhiga sannadkan inuu yahay ku dalxiis dalkaaga, la dal xiis dadkaaga taasoo uu sheegay inuu ula dan lee yahay sidii dadka qurbaha ay waddankooda u imaan lahaayeen, waxa kale uu shacabka ugu baaqay inay xoogga saaraan sidi ay wax soo saarka dalka ugu jeesan lahaayeen inta lagu mashquulsan yahay waxa dibadda ka imaanaya.
Waa markii ugu horaysey Puntland laga hir galiyo shirkad dalxiis masuuliyiin iyo shacab intaasi leegna ay dalxiis ku tagaan degmada Eyl ee Gobalka Nugaal.
PUNTLAND POST