Gudoomiye ku xigeenka dallada ururada bulshada rayidka ah ee Puntland PUNSAA, Seynab Ismaaciil Maxamed (Tiimbiye) ayaa ku dhawaaqday inay tahay musharax u taagan xubin kamid ah barlamaanka federalka Soomaaliya.
Munaasabad ay ku shaacinaysay musharaxnimadeeda ayay Seynab Ismaaciil xalay ku qabatay magaalada Garowe, waxaana kalaso qeyb galay masuuliyiin katirsan dowladda Puntland oo isugu jiray wasiiro, xildhibaano, agaasimayaal. Waxaa sidoo kale kasoo qeyb galay ururada haweenka iyo aqoonyahano.
Gudoomiyaha ururka haweenka Puntland Khadro Warsame Jaamac ayaa sheegtay inay aad ugu faraxsan tahay in Seynab Ismaaciil iskusoo taagto xubin xildhibaan, iyadoo ku ammaantay inay tahay qof uqalma booskaas oo lagu aamini karo dadka iyo dalka, waxayna balanqaaday inay ku taageeridoonaan sidii ay uga guul gaari lahayd hamigeeda siyaasadeed ee Soomaaliya.
Xildhibaan Siciid Cabdi Samatar (Surcad) oo kamid ah barlamaanka Puntland ayaa sheegay inuu aqoon durugsan u leeyahay Seynab Ismaaciil iyo doorka ay bulshada kaga jirto, isagoo qiray inaanu jirin cid maanta kaga mudan in lagu taageero xilkaan, wuxuuna intaas ku daray in loo baahan yahay dad iyada lamid ah inay u tartamaan masiirka Soomaaliya, si loo helo xildhibaano qaran oo u adeegaya danta bulshada ay ka yimaadeen.
Agaasimaha guud ee wasaaradda deegaanka Puntland Muno Daahir Dalmar ayaa sheegtay iyadoo ku hadlaysay afka jiilka dhalinyarada ah ee dowladda ku jira inay soo dhoweynayso cid walba oo tayo leh oo bulshada wax usoo qabatay sida Seynab oo kale, waxayna cadeysay inay hiil iyo hool ay la garab taagan yihiin sidii Seynab iyo dadka lamid ah siyaasada Soomaaliya ugasoo dhex muuqan lahaayeen.
Musharax Seynab Ismaaciil Maxamed oo iyaduna goobta ka hadashay ayaa u mahad celisay dhammaan dadkii ku dhiiri geliyay inay iskusoo sharaxdo jagadaan iyo kasoo qeyb galayaasha xaflada. Seynab waxay sheegtay sababta ay isugusoo sharaxday xilkaan inay tahay dhowr arrimood oo kala ah, inay kor u soo qaado xuquuqda haweenku ku leeyihiin wadanka, inay ka shaqeyso sidii loo heli lahaa xuquuqda Puntland ku leedahay dowladda federalka Soomaaliya iyo inay noqoto xildhibaan ku shaqeeya talada shacabka reer Puntland lagalana xisaabtamo wixii loo dirsaday.
Seynab Ismaaciil waxay sheegtay inay toban sano in ka badan kasoo shaqeynaysay horumarnta arrmaha bulshada, islamarkaana ay lasoo shaqeysay hay’addo caalamiya iyo kuwo maxali ah iyo dowladda laamaheeda qeyb kamid ah, waxayna intaas ku dartay inay waxbarashadeeda inta ugu badan ay kasoo qaadatay dalka gudihiisa, marka laga reebo shahaadada labaad ee Masterka oo ay kusoo diyaarisay Maleysia.
Wasiirka haweenka dowladda Puntland Aniso Cabdulqaadir Xaaji Muumin oo ugu dambayn ka hadasay xaflada ayaa sheegay Seynab Ismaaciil inay ugu tirsan tahay gabadhaha reer Puntland ee u ordaya siyaasada islamarkaana tusaale u noqondoona haweenka Puntland iyo bulshada ay kasoo jeedo.
Wasiirka haweenka ayaa ku baaqay in la taageero Seynab Ismaaciil iyo hamigeeda siyaasadeed, waxayna bulshada ay kasoo jeeda ka codsatay inay kalsooni siiyaan oo ay ku aaminaan inay matali karto dadkeeda iyo dalkeeda.
Dadkii kasoo qeyb galay xafladaan ayaa dhammaantood si buuxda u taageeray Seynab Tiimbiye, iyagoo si guud ugu baaqday waxgaradka iyo Isimada beesha Seynab inay taageeraan codigooda ah in musharaxada noqoto matalaha dadkeeda.
Daawo Sawiradda
Puntlandpost.com