Muqdisho (PP) ─ Wasaaradda Arrimaha Dastuurka ee Soomaaliya, ayaa maanta kulan wadatashi ah oo ku saabsanaa hanaanka dib-u-eegista Dastuurka la yeelatay Maamulka Gobolka Banaadir.
Kulanka oo ay ka soo qaybgaleen Gudoomiyaha Gobolka Banaadir, Gudoomiye Ku-Xigeenada, Xoghaya-Guud ee Gobolka, iyo Gudoomiyayaasha Degmooyinka ayaa waxaa looga hadlay arrimo ay kamid ahaayeen dib-u-egiista Dastuurka iyo Maqaamka Muqdisho.
Wasiir C/raxmaan Xoosh Jibriil oo kulanka ka hadlay ayaa sheegay inay muhiim tahay wada-shaqayn dhexmarta Wasaaradda iyo Maamulka G/Banaadir oo ku aadan dib-u-eegista Dastuurka.
“Maanta waxaa farxad wayn inoo ah inaan la kulanno Maamulka Gobolka Banaadir oo aan ka talagelino hannaanka dib-u-eegsita Dastuurka, waxaa muhiim inoo ah inaan yeelanno wadashaqayn si aan isaga kaashano hawlaha ina horyaalla, waana hubaa madaxda gobolka in ay yihiin masuuliyiin aan si dhaw u wadashaqayn doonno” ayuu yiri Wasiirka.
Dhinaca kale, Gudoomiyaha Gobolka ahna Duqa magaalada Muqdisho Mudane Taabid ayaa uga mahadceliyay Wasaaradda hawlaha ay qabatay mudooyinkii dambe isaga oo u ballanqaaday in ay si dhaw u wadashaqayn doonaan.
Ugu dambeyn, Gudoomiyeyaasha Degmooyinka ayaa fikradahooda ku saabasan Geedi-socodka dib-u-eegista Dastuurka la wadaagay Wasaaradda.
PUNTLAND POST