Madaxweynaha cusub ee dowladda federaalka Soomaaliya Xasan Sheekh Maxamuud ayaa magacaabay la-taliyaha amniga qaranka iyo agaasimeyaasha madaxtooyada.
Madaxweyne Xasan Sheekh ayaa la-taliyaha amniga qaranka u magacaabay Xuseen Macallin Maxamuud oo horay xilkan u soo qabtay, wuxuuna baddelay Fahad Yaasiin oo xilkan hayay. Xuseen ayaa muddooyinkii dambe madax ka ahaa mac-hadka daraasaadka amniga Hiraal oo fadhigiisu yahay Muqdisho.
Dhanka kale Madaxweyne Xasan Sheekh ayaa u magacaabay Xuseen Sheekh Maxamuud agaasimaha guud ee madaxtooyada, halka uu Maxamed Amiin Sheekh Cismaan u magacaabay ku-xigeenka agaasimaha.
Agaasimaha cusub ee madaxtooyada Xuseen Sheekh Maxamuud oo horey u soo noqday Senator ka tirsan Golaha Aqalka Sare ayaa sanadkii 1982 ku dhashay magaalada Xudur ee gobolka Bakool, waxbarashada aas-aasiga ah iyo jaamacadda heerka 1-aad wuxuu ku qaatay magaalada Muqdisho, waxbarashada heerka labaad ee jaamacaddana waxa uu ka diyaariyey daraasaadka horumarinta, halka uu haatan ku guda jira takhasusuka Phd-ga ee nabadda iyo arrimaha dowliga ah.
Sidoo kale Mudane Maxamed Amiin Sheekh Cusmaan Amiin ayaa ah aqoonyahan labo shahaado ka haysta heerka 2-aad ee jamaacadda, isaga oo ku takhasusay horumarinta dhaqaalaha, maareynta nabadda iyo ammaanka Afrika. Wuxuu hore u soo noqday Senator ka tirsan Aqalka Sare ee Baarlamaanka JFS iyo Guddoomiyaha guddiga difaaca iyo amniga ee Golaha Aqalka Sare, sidoo kale waxa uu soo noqday safiir ku-xigeenka safaaradda Soomaaliya ee dalka Kenya.
Mas’uuliyiinta la magacaabay ayaa qaar ka mid ah ka tirsan yihiin xisbiga UPD oo uu asaasay Madaxweye Xasan Sheekh Maxamuud.
PUNTLAND POST
You must be logged in to post a comment.