Muqdisho(Puntland Post) Waxaa meel wanaagsan maraya koobka mamulada gobaladda dalka oo dhowaan ka furmay magalo madaxda Soomaaliya ee Muqdisho.
Galabta waxaa wada ciyaaray xulalka Jubbaland iyo Gal-Mudug oo ka wada tirsan guruubka labaad, ciyaarta labadaasi xul ayaa ahayd mid aad uxiiso badan kasoo qayb galayaashiina ay ku riyaaqeen.
Jubbaland ayaa ciyaartii hore waxaa labo iyo hal uga soo badiyay xulka Hiiraan/Shabeelaha dhexe, balse galabta ayay muujiyeen in ay koobkan baaqi kusii ahaan karaan markey soo bandhigeen ciyaar ka duwan tii ay horay u dheeleen.
Taageerayaal faro baddan oo labada xul la jira ayaa garoonka soo camiray, waxaana muuqatay in dadku ay aad ugu xiiso qabaan in dib loosoo nooleeyo ciyaarihii kala duwanaa ee dalka lagu qaban jiray sida,oraddada, kubada gacanta iyo dabaasha.
Guruubka labaad waxaa min saddex dhibcood leh xulalka Jubbaland iyo Hiiraan/Shabeelaha dhexe,halka guruubka koowaadna ay min saddex dhibcood lee yihiin Banaadir iyo Puntland.
Beri galab haddii idmo waxaa wada dheelaya xulalka matalaya Puntland iyo Banaadir, dadka saadaaliya ciyaaraha ayaa ku tilmaamay inay tahay ciyaarta ugu adag ee koobkab, waxayna intaasi sii raaciyeen inay xitaa suurta gal tahay kii badiya inuu koobka qaadi karo.
Mamulka gobalka Banaadir iyo wasaradda ciyaaraha ayaa ku tilmaamay koobkan mid lagu ballaarinayo is-dhexgalka shicibka iyo dhalinyarada, ayna muhiim tahay sii xoojinta ciyaaraha dalka.
Koobkan ayaa u dhaxeeya Banaadir,Puntland,Jubbaland,Koonfur Galbeed,Galmudug iyo Hiiraan/Shabeelaha.
PUNTLAND POST