Ciidanka Booliska Puntland ayaa maanta ku wareejiyay laamaha amniga ee Dowlad Deegaanka Soomaalida (DDS), Xiddig Siciid Sheekh Xirsi, kaas oo ku eedeysan dilka marxuum Cabdi Maxamuud Wayrax oo dhacay taariikhdu markay ahayd 08/10/2018.
Wareejinta eedeysanaha oo ka dhacday degmada Galdogob waxaa hoggaaminayey Taliyaha Qeybta Booliska Gobolka Mudug, G/Sare Maxamuud Muuse Bille (Fardafuul), halka dhinaca Dowlad Deegaanka Soomaalida uu eedeysanaha kala wareegay Taliyaha Komaandhiska Booliska Gobolka Doolo, G/Dhexe Cabdullaahi Ibraahim Maxamuud.
Kadib wareejinta, labada taliye ayaa si wadajir ah u qabtay shir jaraa’id, waxaana goob joog ka ahaa Kusimaha Taliyaha Saldhigga Booliska Degmada Galdogob, X/Le C/Raxmaan Yaasiin Xasan (Qoodaar).
Mas’uuliyiintu waxay adkeeyeen muhiimadda ay leedahay xoojinta wada-shaqeynta joogtada ah ee u dhexeysa Ciidanka Booliska Puntland iyo laamaha amniga ee Dowlad Deegaanka Soomaalida, gaar ahaan is-weydaarsiga xogaha amniga iyo isu-gudbinta eedeysanayaasha ka baxsada labada dhinac, si loo xaqiijiyo caddaaladda, loona xoojiyo amniga iyo la-dagaallanka dambiyada ka gudba xuduudaha.
PUNTLAND POST