Ciidamo ka tirsan Booliiska Puntland, ayaa si ramsiya looga wareejiyay Amniga Xarunta Baarlamanka Puntland ee magaalada Garoowe, kadib markii xildhibaannada qaarkood ay cabasho ka muujiyeen ciidamo hore u joogay Xarunta.
Xildhibaanno ka tirsan Golaha Wakiilada Puntland oo muran kala dhexeeyo Guddoomiyaha Baarlamanka, ayaa maalin ka hor cabasho ka muujiyay Ciidanka Ilaalada xarunta Baarlamanka, kuwaas oo sida ay sheegeen u adeega Guddoomiye Cabdirashiid oo keliya.
Waxay sidoo kale Guddoomiyaha ku eedeeyeen, in uu Ciidankaas u isticmaalo cabburinta xildhibaannada isaga ka horjeeda, islamarkaana uu af-duub ahaan u haysto Xarunta Baarlamanka, waxaana ay wakhtigaas dalbadeen in xarunta lagu wareejiyo Ciidamo Booliis ah.
Dhinaca kale, waxa socda dadaal lagu dhex-dhexaadinayo Guddoomiyaha Baarlamanka iyo xildhibaannada muranku kala dhexeeyo, kuwaas oo ku hanjabay in ay mooshin ka keeni doonaan, si xilka looga qaado.
PUNTLAND POST