Ciidanka Booliiska Somaliland, ayaa Xabsiga u taxaabay sagaal nin oo u dhashay waddanka Imaaraatka Carabta, kuwaasi oo lagu eedeeyay in ay si sharci-darro ah uga ugaarsanayeen degaannada Somaliland.
Mas’uuliyiin ka tirsan Wasaaradda Degaanka Somaliland, ayaa laga soo xigtay in raggaasi saaka laga qabtay garoonka diyaaradaha magaalada Hargeysa ee caasimadda Somaliland, xilli ay doonayeen in ay ka dhoofaan halkaasi.
Raggaas ayaa sida la sheegayo, waxay Ugaar badan ku laayeen degaanka Saba-wanaag oo ka tirsan gobolka Waqooyi Galbeed ee Hargeysa xarunta u tahay, waxaana sawiro baraha bulshada la soo geliyay laga arkay raggaasi oo kor dhooban noocya ugaarta kamid ah oo dhulka daadsan.
Bulshada ku dhaqan degaanka Sabo-Wanaag, ayaa warbaahintu ka soo xigatay, in markii raggaasi degaanka yimaadeen, ay dadweynaha u sheegeen in ay mashaariic ka fulinayaan halkaasi, balse markii dambe ay ugaarsi bilaabeen.
PUNTLAND POST
You must be logged in to post a comment.