Waxaa maanta oo Arbaco ahayd galinkii dambe la shaaciyay liiska cusub ee Golaha deegaanka degmada Badhan ee gobolka Sanaag, kuwaas oo ka kooban 28 xubnood oo Sagaal ka mid ah Haween yihiin.
Wasaarada Arrimaha Gudaha Puntland, ayaa hogaaminaysay hanaanka doorashada Guddoomiyaha iyo ku xigeenka degmada Badhan, waxaana goob joog ka ahaa wasiiro, xildhibaano, guddoonka gobolka, cuqaal, haween iyo waxgarad.
Golaha cusub ee degmada Badhan ayaa caawa Guddoomiye u doortay Axmed Maxamed Timir oo wareegii ugu horreeyey helay 16 cod, halka musharaxii la tartamayay Maxamed Cabdiqaadir Yusuf uu helay 12 cod.
Doorashada Guddoomiye ku xigeenka degmada Badhan ayaa ahayd mid xiiso badan, Xaawo Maxamuud Faarax ayaa loolan adag la gashay Shan murashax oo Afar ka mid ah rag yihiin, waxayna wareegii saddexaad kaga adkaatay 15 cod musharaxii la tartamayay Xasan Cali Xasan oo helay 13 cod.
Guddoomiye ku xigeenka degmada Badhan Xaawo Maxamuud Faarax ayaa noqotay Haweeneydii ugu horeysay oo xil sare ka qabata dowladaha hoose ee Puntland.
Xaawo waa gabar dhalinyaro ah oo madax ka ahayd urur arrimaha bulshada ka shaqeeya, waxayna aqoon u leedahay maamulka iyo maaraynta oo ay ku diyaarisay heerka koowaad ee jaamacadda.
PUNTLAND POST
You must be logged in to post a comment.