Kooxda Barcelona ayaa guul muhiim ah ka gaartay kooxda ay xifaal tamaan ee Real Madrid kulankii xiisaha lahaa ee El Clasico, ka dib markii ay 3-2 ugu awood sheegatay ciyaar ka dhacday garoonka Santiago Bernabéu ee magaalada Madrid.
Real Madrid ayaa qeybtii hore ee ciyaarta gool la hormartay daqiiqadii 28-aad markii uu gool u dhaliyey Casemiro, laakin Lionel Messi ayaa gool qurux badnaa ku barbareeyey daqiiqadii 33-aad ee isla qeybtii hore ee ciyaarta.
Barcelona ayaa goolkeeda labaad heshay qadiiqadii 73-aad ee qeybtii danbe ee ciyaarta, ka dib markii uu gool u dhaliyey Ivan Rakitic, shan daqiiqo ka dib Real Madrid ayaa la kulantay masiibo markii difaacooda Sergio Ramos loo taagay Kaadhka Cas, ka dib markii uu khalad ku galay Lionel Messi .
Laakiin Real Madrid ayaa goolkeeda barbaraha la timid daqiiqadii 86-aad ee dhamaadka ciyaarta, markii uu gool u keenay James Rodriguez.
Lionel Messi ayaa goolkaas wax kamajiraan ka dhigay wakhtigii dheeriga ahaa ee ciyaarta markii goolkii 500-aad oo uu Barcelona u dhaliyo uu guul ku gaarsiiyey kooxdiisa kulankii El Clasico,waxayna ciyaartu ku soo idlaatay 3-2.
Kooxaha Barcelona iyo Real Madrid ayaa hada wadaaga min 75-dhibcood, inkastoo Real Madrid uu kulan baaqi u yahay.
Liban Yusuf
PUNTLAND POST