Jaaliyadda Somaliyeed ee magaalada Toronto dalka Canada ayaa u qabatay xaflad soo dhaweyn ah Wasiirka Caafimaadka Dowlada Puntland Dr Cabdinaasir Cuuke oo horey uga tirsanaan jiray Jaaliyaddaas.
Wasiirka Caafimaadka Puntland ayaa uga warbixiyay Jaaliyadda ku nool Toronto Xaalada Abaaraha, Caafimaadka iyo Guud ahaan xaalada uu ku sugan yahay dalku, Isagoona warbixin dheer ka jeediyay xaalada abaarta oo uu sheegay in “Sima” loo bixiyey, Puntland ay tahay meesha ugu daran, iyo sida loogu baahanayahay in gacan weyn looga geysto u gargaaridda dadkaas ilaa biyo GU’ laga gaarayo.
Wasiir Cabdinaasir Cuuke ayaa ka hadlay horumarinta caafimaadka, iyo waxa u qabsoomay Puntland,iyo Baahiyaha kala duwan oo u baahan in laga wada qayb qaato.
Dr Cabdinaasir Cuuke ayaa sheegay in Wasaaradiisu 10 degmo oo ah kuwa ka fog laamiga ka wado barnaamij si loo yareeyo dhimashada hooyada iyoo ilmaha soo foodsaarta xillliga foosha , Wuxuuna ka codsaday Jaaliyadda inay kala qeyb qaadato mashruucaas xagga qalabka qalliinka iyo dhismaha qolalka qalliinka.
Xubno kala duwan oo Jaaliyadda katirsan kana hadlay goobta ayaa ballan qaaday inay gacan ka geysanayaan abaaraha iyo mashruuca qiimaha leh oo dhimashada Hooyada iyo ilmaha lagu yaraynayo
Ugu dambeyntii Wasiirka Caafimaadka Puntland Dr Cabdinaasir Cuuke wuxuu uga mahadceliyay Jaaliyadda Reer Toronto soo dhaweynta iyo balanqaadka uu kala kulmay.
PUNTLAND POST