Hay’adda Astaynta Maamul wanaagga iyo La dagaalanka Musuqmasuqa dowladda Puntland ayaa maanta u qabatay shir muhiim ah Nabadoonadda iyo Maamulka Gobolka Nugaal, waxayna ahayd ujeedada shirkaani sidii loogu baraarujin lahaa qeybaha kala duwan ee bulshada qorshaha dowlada ee maamul baahinta Maamul Wanaagga iyo Sidii looga hortagi lahaa dagaal cadna loola gali lahaa Musuqmaasuqa iyo Wax walba oo ka hor imaanaya nidaamka dowladnimada.
Waxaa kasoo qeyb galay shirkan Aqoonyahano, Culimo udiin, Masuuliyiin ka socda Dowlada, Maamulka Gobolka iyo Inta badan Nabadoonada Gobolka Nugaal Kuwaas oo dhamaantood ka dhagaystay Hay,adda Astaynta Maamul wanaagga iyo la dagaalanka musuq masuqa muhiimadda ay leedahay in Maamul wanaag dhab oo muuqda uu ka taabo galo Puntland oo dhan iyo Sidii loo joogteyn lahaa in si wada jir ah ay isaga kaashan lahaayeen Dowlad iyo Shacab intaba.
Agaasimaha hay’adda astaynta Maamul wanaagga Dowladda Puntland Cabdiraxmaan Cali Guureeye ayaa ka warramay qorshahooda la xiriira maamul wanaagga iyo La dagaalanka Musuq maasuqa saddexda sano ee soo socota, Isagoona carabka ku adkeeyey muhiimadda Isimadda, Nabdoonadda iyo Qeybaha kala duwan ee bulshada heer gobol ilaa heer Puntland looga baahan yahay inay taaba galiyaan baahinta Maamul Wanaagga iyo inay qeyb muhiim ah ka noqdaan dhammaantood sidii looga ciribtiri lahaa Puntland musuqmaasuqa.
“Ka xafiis ahaan howlahayaga shaqo ee sannadkan 2017ka waxaa qayb ka ah qorshe aan u bixinay hoos ka dhiska Maamul wanaagga, kaas oo aan doonayno inaan Wacyi galin iyo tabarro badan siino maamullada heer gobol iyo Nabadoonadda Puntland si kor loogu qaado aqoontooda” Ayuu yiri Cabdiraxmaan Cali Guureeye.
Sidoo kale waxaa ka hadlay munaasabadda Sheekh Maxamuud Xaaji Yuusuf Madaxa Jaamacadda Bariga Africa Faraceeda Garowe, Aqoonyahan Aadan Maxamed Ciise (Gaadaale), Gudoomiyihii horre ee Gobolka Mudug, Gudoomiye kuxigeenka Gobolka Nugaal Qaasim Awcabdi, iyo Nabadoono.
Wasiir Kuxigeenka Arrimaha Gudaha Dowlada Puntland Cabdullahi Xaashi Qoobdeero oo gaba gabadii shirka hadal kasoo jeediyay ayaa si qoto dheer uga hadlay ahmiyadd ay leedahay in maamul wanaagga laga wada qayb qaato, Islamarkaana dagaal cad lala galo musuqmaasuqa.
Abshir Dhiirane
PUNTLAND POST