Xafiiska La dagaalanka Burcad badeeda Puntland, Maamulka Gobolka Nugaal, Kan Degmada Garowe iyo Culimo udiinka oo kaashanaya Hay,adda NCA ayaa maanta ku qabtay magaalada Garowe Olole balaaran oo ku saabsan Gurmadka Abaaraha ka jira Puntland, Ka hortaga Tahriibta, iyo Xoojinta Nabadgalyada, Waxaana ka qeyb qaatay ololahaan masuuliyiin ka tirsan Maamulka Gobolka Nugaal, Madaxda Hay,adda NCA, Agaasimaha la dagaalanka Burcad badeeda Puntland, Odoyaal, Culimo udiin , Ardey , Waalidiin iyo Qeybo fara badan oo ka socda bulshada Garowe.
Cabdirasaaq Maxamed Dirir Agaasimaha la dagaalanka Burcad Badeedka Puntland oo ka waramay ujeedada ololahaan ayaa sheegay in looga gol leeyahay sidii tabaaburacaad loogu aruurin lahaa dadka ay saameeyeen abaaraha ku dhuftay dhulka Puntland, Wacyi galino la xiriira ka hortaga musiibooyinka ay ka mid tahay Tahriibta iyo Sidii bulshadu ugala shaqeyn lahayd Xoojinta Amniga Hay,addaha ku shaqada leh.
Ololahaan ayaa bilow wanaagsan u noqonaya kulamo is daba joog ah oo ay Hay,adda NCA ka gacan siinayso Xafiiska la dagaalanka Burcad Badeeda Puntland, Maamulka Gobolka Nugaal, Kan Caasimada Puntland iyo qeybaha bulshada sidii ay guddiyo ugu dhisan lahaayeen ka shaqeynta arrimo ay ka mid yihiin joojinta Tahriibta, Uruurinta Tababuracaad gurmad loogu fidinayo dadka ay saameeyeen Abaaruhu iyo Gacan ka geysashada Amniga.
Gudoomiye kuxigeenka Gobolka Nugaal Qaasim Awcabdi ayaa ku amaanay Hay,adda NCA iyo Xafiiska la dagaalanka burcad badeeda kaalintan muhiimka ah ee ay ka istaageen wax u qabashada dalka iyo dadkaba, wuxuuna ugu baaqay Dadweynahaba inay kaalintooda ka qaataan barnaamijkan oo uu ku tilmaamay inuu yahay mid wax ku ool.
Dhinaca kale waxaa ka hadlay ololahaan oo kulan balaaran oo horudhac u ah loogu sameeyay Xarunta Guriga Gobolka Nugaal,Culimo, Ardey, Odoyaal iyo Qeybo kale oo ka tirsan Bulshada Rayidka ah oo dhamaantood madasha ka jeediyay hadalo muhiim u ah gurmadka abaarta, ka hortaga tahriibta iyo xoojinta Nabadgalyada.
Abshir Dhiirane
PUNTLAND POST.