Xaflad si heer sare ah loo soo agaasimay oo ku saabsan soo afmeerida ololaha 16 ka beri ee Tacadiyadda ka dhanka ah Jinsiga iyo Sidoo kale maalinta caalamiga ee Xuquuqul Iinsaanka ayay maanta si wada jir ah ugu qabteen magaalada Garowe Wasaarada Horumarinta Haweenka iyo Arrimaha Qoyska Dowlada Puntland iyo Hay,adda Xuquuqul Iisaanka Dowlada Puntland.
Waxaa kazoo qeybgalay Xafladan Masuuliyiin ay ka mid yihiin Wasiirka Haweenka Drs Aniso Cabdulqaadir Xaaji Muumin, Wasiirka Waxbarashada iyo Tacliinta Sarre Prof Abshir Awyuusuf Ciise, Xildhibaano, Madax sarre oo ka socotay Hay,addaha Qaramada Midoobay , Hay,addaha Caalamiga, Aqoonyahano iyo Marti sharaf kale.
Ugu horeyn Agaasimaha guud ee Wasaaradda Horumarinta Haweenka iyo Arrimaha Qoyska Dowlada Puntland Cabdirasaq Nuux Maxamed oo furay xaflada ayaa faahfaahin ka bixiyay muhiimiyadda ay leedahay maalintan iyo hawlihii ay qabatay Wasaaraddu 15ka beri ee uu socday ololahani.
Wasiirka Wasaaradda Waxbarashada iyo Tacliinta Sarre Prof Abshir Awyuusuf Ciise oo isna ka hadlay munaasabada ayaa sheegay si loo yareeyo Tacadiyada ka dhanka Haweenka iyo Caruurta in wax la baro.
Masuuliyiinta ka socotay Hay,addaha Qaramada Midoobay iyo Kuwa kale ayaa Iyana dhankooda sheegay inay ku faraxsan yihiin hawlaha la xiriira Horumarinta Haweenka iyo Arrimaha Qoyska ee ay wado Wasaaradda Haweenka Puntland.
Wasiir Aniso Cabdulqaadir Xaaji Muumin oo soo xirtay munaasabada ayaa sheegtay in Wasaaradda Horumarinta Haweenka iyo Arrimaha Qoyska Puntland iyo Bahwadaagteeda oo ay ugu horeeyaan Hay,addaha Qaramada Midoobay iyo Kuwa Caalamiga ay guulo aan caadi ahayn 2016 ka gaareen shaqooyinkii ay wada qabteen.
Wasiir Aniso ayaa sheegtay in Soomaaliya ay Puntland ugu horeyso yareynta shaqaaqooyinka ka dhanka ah haweenka iyo caruurta taasina ay ku timid dadaalo iyo waqti dheer oo la galiyay, waxay kaloo sheegtay in sanadkii 2016 la sameeyay xeerar fara-badan oo la xiriira kor u qaadida nolosha caruurta iyo ilaalinta haweenka.
Wasiirka Horumarinta Haweenka iyo Arrimaha Qoyska Dowlada Puntland ayaa shahaado sharaf la xiriiirta hawlkarnimadooda iyo shaqooyinka ay u hayaan Puntland gudoonsiisay Hay,addaha UNDP, UNICEF iyo UNSOM.
Dhinaca kale Wasaaradda Haweenka iyo Arrimaha Qoyska ayaa si la mid ah maanta ugu qabatay magaalooyin ku yaala Gobolada Puntland munaasabado la xiriira soo xiritaanka ololaha 16-ka beri ee tacadiyadda ka dhanka ah arrimaha Jinsiga.
Abshir Dhiirane
PUNTLAND POST.