Madaxweynaha Dowladda Puntland Cabdiweli Maxamed Cali Gaas ayaa maanta dib ugu soo laabtay magaalada Garowe ka dib Safar qaatay labo toddobaad uu ku tagay Wadamada China, Itoobiya iyo Kenya , waxaana si diiran ugu soo dhaweeyay Garoonka Diyaaradaha Konoco Masuuliyiin ka tirsan Labada golle ee Dowladda Puntland, Saraakiil ka tirsan Madaxtooyadda, Saraakiisha Amniga iyo Qeybo ka socda Dadweynaha.
Madaxweyne Gaas ayaa ka warbixiyay socdaalkiisa iyo arrimo ku aadan doorashada dalka Soomaaliya , Abaaraha ka jira Puntland, Howlgalkii Ciidamada Puntland todobaadkan kula wareegeen magaalada Qandala ka dib shir jaraa,iid oo uu kula hadlay Warbaahinta
Madaxweynaha Puntland oo ka hadlaya doorashada Aqalka hoose ee Baarlamanka Federalka oo dib uga bilaamatay magaalada Garowe ayaa sheegay inuu taageersan yahay go,aankii guddiga ee ku aadanaa qoondada haweenka laga siiyay Xildhibaanada Puntland u matali doona Aqalka Hoose.
Sidoo kale Madaxweyne Gaas ayaa ka hadlay muranka ka jira xubnaha aqalka sarre Gobolada Waqooyi , wuxuna tilmaamay inaysan sax ahayn qaabka loo wajahayo arrintaas.
Dhinaca kale Madaxweyne Cabdiwali Gaas ayaa uga hadlay shirka jaraa,iid ee uu maanta wariyaasha kula hadlay magaalada Garowe hawlgalkii ciidamada Puntland ay dib ugu qabsadeen magaalada Qandala, wuxuuna si weyn ugu amaanay ciidanka guusha ay ka gaareen hawlgalkaas.
Abshir Dhiirane
PUNTLAND POST