Garowe (Puntland Post):- Shir ay maanta isugu yimaadeen magaalada Garowe Gudoomiyayaasha Gobolladda Puntland ayay ku samaysteen dallad ay ku mideysan yihiin, Taas oo ay u doorteen hogaankeeda Gudoomiyaha Gobolka Nugaal Cumar Cabdulaahi Fara-weyne, Halka xoghayaha dallada ay u doorteen Maxamuud Siciid Ciyoon oo ah Gudoomiyaha Gobolka Sanaag ee Puntland .
Shirkan ay kaga dhawaaqeen dallad ay ku mideysan yihiin Gudoomiyayaasha Goboladda Puntland waxaa furay Kuxigeenka Wasiirka Arrimaha Gudaha Dowlada Puntland, Waxaana goobjoog u ahaa qaar ka mid ah Gudoomiyayaasha Degmooyinka iyo Qeybo kala duwan oo ka socda Hay,addaha Dowlada Puntland.
Cumar Abdulaahi Faraweyne ayaa ku sheegay baahida keentay dalladan inay tahay sidii maamulada Goboladda Puntland guud ahaan isaga kaashan lahaayeen arrimaha sugida amaanka, horumarinta, iyo Sidii ay u yeelan lahaayeen Iskaashi dhaw oo ku dhisan isku soo dhawaanshaha bulshada reer Puntland ee ay hogaanka u yihiin Gudoomiyaaasha Gobolladdu.
Waa markii ugu horeysay oo Gudoomiyaasha Gobolladda Puntland ay yeelanayaan dallad ay ku mideysan yihiin, Iyadoo uu horey u jirey urur mideeya Gudoomiyaasha maamulladda Degmooyinka Puntland.
Daawo Sawirro.
Abshir Dhiirane
PUNTLAND POST