Garowe (Puntland Post):- Wasaaradda Horumarinta Haweenka iyo Arrimaha Qoyska Dowlada Puntland ayaa maanta daahfurtay ololaha 16-ka beri Daahfurtay ee tacadiyada ka dhanka ah jinsiga, waxaana kazoo qeyb galay munaasabadii lagu daahfurayay Wasiirka Haweenka Drs Aniso Cabdulqaadir Xaaji Muumin, Gudoomiyaha Hay,adda Xuquuqul Iisaanka Puntland,Wasiirka Shaqada iyo Shaqaalaha Puntland, Saraakiil ka socota hay,addaha UN-ka,Hay,addaha Caalamiga, NGO-yada gudaha,Odoyaal dhaqmeed, Haween iyo Marti sharaf kale.
Ololahaan ayaa ka bilaaban doona 25 November wuxuuna socon doonaa ilaa 10 bisha December 2016, waxaana qorshuhu yahay in sanadkan la isku waafajiyo ka hortaga iyo gurmadka abaaraha ka jira Deegaanada Puntland, Madaama ay yihiin dadka ugu badan oo abaartu saamaysay Haween iyo Caruur.
Wasiirka Wasaaradda Horumarinta Haweenka iyo Arrimaha Qoyska Puntland Drs Aniso Cabdulqaadir Xaaji Muumin oo khudbad dheer ka jeedisay furitaankii ololahan ka dhanka ah tacadiyadda jinsiga ayaa kula dardaarantay waalidiinta inay caruurtooda ku tarbiyeeyaan dhaqanka Islaamka si loo yareeyo tacadiyada ka dhan ah ilmaha ee dhanka akhlaaqda.
Drs Aniso waxaa kale oo ay ka hadashay xaalada abaaraha dalka ka jira waxayna sheegtay in dowlada Puntland ay maanta kazoo saartay baaq caalamiya, Islamarkaana inta ay socdaan shaqooyinka ololahaan 16-beri ah in looga faa,iideysan doono gurmadka abaaraha.
Wasiir Aniso ayaa intaas ku dartay in Dowlada Puntland ay hormuud u tahay geeska Africa ka hortaga tacadiyada iyo ciribtirkooda, Islamarkaana ay dowladu kazoo saartay siyaasado badan oo hoos u dhigaya tacadiyadda jinsiga, kuwaas oo ay ka mid ahaayeen Xeerka Kufsiga Gabdhaha, Siyaasadda ka hortaga Tahriibta iyo ka ganacsiga dadka,Siyaasadda Daryeelka Dadban ee Caruurta Dayacan, Siyaasadda ka hortaga gudniinka gabdhaha iyo Siyaasado kale oo dhamaantood ka hortagaya nooc walba oo ka dhan ah jinsiga..
Dhinaca kale Wasiirka Shaqada, Shaqaalaha , Dhalinyarada iyo Ciyaaraha Puntland Cabdiraxmaan Sheekh Axmed oo ka mid ahaa masuuliyiintii ka hadlay munaasabada maanta lagu daahfuray ololaha 16-ka beri ee ka hortaga tacadiyadda ka dhanka ah Jinsiga ayaa ku amaanay Wasaaradda Haweenka doorka ay ka ciyaareyso horumarinta Haweenka iyo Arrimaha Bulshada.
Abshir Dhiirane
PUNTLAND POST.