Garowe (Puntland Post):- Deeq isugu jirta Bur, Sonkor , Bariis, Saliid iyo Cuntooyinka Fudud ayay u qeybiyeen xubno ka mid ah guddiga gurmadka abaaraha ka jira Puntland 68 qoys oo dagan miyiga deegaanka Faleryaale ee Gobolka Sool,waxaan laga soo aruuriyay cuntada qoysaskan loo qeybiyay Xaafadda dadka degan Xaafadda Horseed ee Garowe iyo Qaar ka mid ah dadka ku nool dalalka Qurbaha.
Maxamed Yuusuf Jaamac Tigay oo ah Gudoomiyihii hore ee gobolka Mudug oo ka mid ah xubnaha hormuudka ka ah Ololahaan gurmadka ah ee lagu caawinayo dadka ay abaarahu sameeyeen ayaa u mahad celiyay dadka Somaaliyeed gaar ahaan bulshada Puntland siday iskaga fakarayaan iskuna caawinayaan , Wuxuuna sidoo kale shacabka usoo jeediyay inaysan gacan shisheeye waxba ka sugin oo isku tashadaan.
Qoysaskan la gaarsiiyay deeqda isugu jirta raashinka iyo cuntada waxay sidoo kale u geeyeen xubnahaan ka tirsan guddiga gurmadka abaaraha Puntland deeqda biyo ah oo lagu waraabinayo iyaga iyo xoolahooda kuwaas oo la ildarnaa haraad iyo asqo.
Dhinaca kale Kooxda uu hogaaminayo Gudoomiye Tigey ee maanta deeqda ka qeybiyay deegaano ka tirsan Gobolka Sool ayaa isku xilqaamay gubista bakhtiga xoolihii ku le,eday abaaraha ka jira deegaanka oo daadsan dhulka dooxooyinka ah.
Abshir Dhiirane
PUNTLAND POST