Garowe (Puntland Post):- Wasaaradda Haweenka iyo Horumarinta Qoyska Dowlada Puntland ayaa maanta u qabatay Haweenka u sharaxan aqalka hoose ee baarlamanka Soomaaliya iyo Kuwa ku guulaystay Xildhibaanada Aqalka Sarre Puntland u matali doona baarlamanka kulan lagu soo dhaweynayo , waxaana kazoo qeyb galay Madaxweyne Kuxigeenka Puntland, Wasiiro,Haweenka Xildhibaanada ee Aqalka Sarre , Kuwa musharaxiinta ee u tartami doona Aqalka hoose,Madaxa Xafiiska Siyaasadda Qaramada Midoobay ee Puntland, Odoyaal dhaqmeed iyo Marti sharaf kale.
Wasiirka Haweenka iyo Horumarinta Qoyska Puntland Drs Aniso Cabdulqaadir Xaaji Muumin ayaa faahfaahisay ujeedada kulankaan waxayna sheegtay inuu qeyb ka yahay Kulamo lagu xaqiijinayo in haweenku ay heleen qoondadii %30 ee kuraasta Baarlamanka Soomaaliya.
Drs Aniso Cabdulqaadir Xaaji Muumin ayaa si adag ugula dardaarantay in Odoyaasha dhaqanku tixgaliyaan kaalinta haweenku ku leeyihiin hogaaminta dalka iyo ka qeybgalka Arrimaha Siyaasadda.
Madaxa Xafiiska UNSOM ee Puntland Howard Bell oo ka mid ahaa masuuliyiintii ka hadlay kulankaan ayaa sheegay in Puntland ay hogaaminayso doorashooyinka Aqalka sarre iyo Kan Hoose ee dalka Soomaaliya, Islamarkaana uu rajeynayo inay door muuqda haweenku ku yeeshaan kuraasta labada aqal.
Waxa uu sheegay Mr Howard Bell inuu soo gaari doono Puntland galabnimada isniinta soo socota Ergeyga gaarka ah ee Xoghayaha guud ee Qaramada Midoobay u qaabilsan Soomaaliya, Isagoona kula kulmi doono Madaxweynaha Puntland Cabdiwali Maxamed Cali Gaas magaalada Bosaso, Islamarkaana arrimaha ugu waaweyn ee uu kala hadli doono ay qeyb ka yihiin xaqiijinta Qoondada haweenku ku leeyihiin kuraasta baarlamanka.
Dhinaca kale waxaa kulanka ka hadlay qeybo ka socday Haweenka ku guulaystay Xildhibaanimada Aqalka Sarre, Kuwa u sharaxan kuraasta Aqalka Hoose, Wasiiro ka tirsan Xukuumadda Puntland iyo Odoyaasha dhaqanka, waxayna dhamaantood si isku mid ah isugu raaceen inaan haweenka la duudsiin Karin xaqa ay ku leeyihiin dalka.
Ugu danbeyntiina waxaa soo xiray kulankaan Madaxweyne kuxigeenka Dowlada Puntland Eng Cabdixakiin Cabdulaahi Cumar Camay oo sheegay in Xukuumadiisu door muuqda iyo kaalin mug leh ka ciyaareyso xaqiijinta kuraasta haweenku ku leeyihiin Xildhibaanada ka imaanaya Puntland ee Aqalka Sarre iyo Kan Hooseba.
Daawo Sawwirada.
Abshir Dhiirane
PUNTLAND POST