Garowe(Puntland Post) Madaxwaynaha Puntland Cabdiweli Maxamed Cali (Gaas) ayaa maanta furay kalfadhiga 37-aad ee Baarlamaanka Puntland, waxaana furitaankiisa ka qayb galay xubno ka socda golayaasha kala duwan ee dowladda, beesha caalamka. qurbajoog,saraakiil ciidan,culimo, isimo iyo marti sharaf kale.
Gudoomiye ku xigeenka koowaad ee Baarlamaanka ahna ku simaha Gudoomiyaha Cabdixamiid Shiikh Cabdisalaan Ciise oo ugu horeyntii hadlay ayaa sheegay kalfadhigan in looga hadli doono arrimo badan oo ay ka mid tahay la xisaabtanka xukumadda iyo waxyaabaha la hor keeno.
Agaasimaha qurbajoogta Puntland, Agaasime ku xigeenka Daladda PUNSAA iyo Gudoomiyaha Haweenka ayaa ka mid ahaa dadkii furitaanka kalfadhiga ka hadlay waxayna sheegeen in wax badan la qabtay intii u dhaxaysay kalfadhigan iyo kii ha horeeyay.
Madaxwayne Gaas oo jeediyay khudbad daqiiqado badan socotay ayaa ku nuux nuuxsaday waxyaabaha xukumaddiisa u qabsoomay muddada u dhaxaysa kalfadhigii hore iyo kalfadhigan, wuxuu sheegay in wax muuqda ay ka qabteen xagga ammaanka,caafimaadka,xanaanada xoolaha,waxbarashada, kaabayaasha dhaqaalaha, iyo xoojinta xiriirka Puntland ee caalamka.
Arrimaha hanaanka doorashada 2016 ayuu ka hadlay, wuxuu ku tilmaamay tanaasulka Puntland u samaysay in la qaado hanaanka 4.5 ay timi ka dib markii Soomaaliya bad baadinteeda la eegay, balse waxa uu cadeeyay inaan hanaankaasi dib loogu laaban doonin.
PUNTLAND POST