Madaxweynaha dawladda Puntland Dr. Cabdiweli Maxamed Cali Gaas iyo waftigii uu hoggaaminayey ee maanta 18- May-2016 kasoo amba baxay magaalada Boosaaso ee xarunta ganacsiga Puntland ayaa soo gaarey magaaalada muqdisho ee caasimadda dalka Soomaaliya.
Madaxweynaha iyo waftigiisa ayaa waxaa garoonka caalamiga ah ee Aadan Cabdulle kusoo dhoweeyey xubno ka tirsan labada gole ee dawladda Federaalka Soomaaliyeed oo uu hoggaaminayo Wasiirka Caddaadda Dawladda Federaalka Soomaaliya Jeneraal Cabdullaahi Axmed Jaamac Ilko-jiir , waxaana soo dhoweyn ka dib Madaxweynaha iyo waftigiisa loo gudbiyey qaybta nasashada ee garoonka.
Nasasho Kadib Madaxweynaha iyo Waftigiisa waxaa loo sii gudbiyey Xarunta Madaxtooyada Soomaaliya gaar ahaan Villa Hargaysa, halkaas oo uu Madaxweynuhu ka degi doono magaalada Muqdisho ee caasimada dalka Soomaaliya.
Madaxweynaha dawladda Puntland iyo waftigiisa ayaa magaalada Muqdisho kaga qayb geli doona shir labo maalmood socon doona, shirkaas oo ay kasoo qayb geli doonaan xubno ka socda golaha Ammaanka ee Qaramada Midoobey iyo madaxda kala duwan ee Soomaalida.
Shirkaas ayaa looga hadli doonaa arrimo ay ka mid yihiin nabagelyada guud ee dalka Soomaaliya, xaaladda kala guurka ah ee dalku uu kujiro, hannaanka geeddi socodka doorashooyinka 2016-ka, heshiisyadii dhexmaray dawladda federaalka iyo dawladaha xubnaha ka ah iyo arrimo kale.
—DHAMMAAD—
XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.
