Muqdisho(Puntland Post) Magalada Muqdisho xarunta Soomaaliya ayaa shalay lagu doortey hoggaanka ururka suxufiyiinta qaranka Soomaaliyeed ee NUSOJ, ka dib markii ergo matalaysa dhammaan suxufiyiinta dalka ay doorashadaasi oo muddo laga soo shaqaynayay ka qayb galleen.
Doorashadda hoggaanka sare oo ay ka qayb galeen 149 wariye oo ka kala yimi gobaladda dalka ayaa waxay gudoomiyaha ururka u doorteen Maahir Jaamac Aadan oo ka mid ahaa wariyashii ka socday Puntland, halka Xoghayaha guudna uu noqday wariyihii hore ee BBC Maxamed Ibraahim Macalimuu.
Gudoomiye ku xigeenka koowaad ayay ergaddu u doorteen Muxyadiin Xusni oo ka socda wariyaasha koonfur galbeed halka kan labaadna u doorteen Cabditufaax Xasan Faarax oo ka socday wariyaasha Gal-Mudug.
Doorashada ayaa u dhacday hab sanduuq ah,waxaana goobjoog u ahaa masuuliyiin ka socda dowladda sida XIldhibaan Maxamed Cumar Dalxa, Gudoomiyaha ururka haweenka Gobalka Banaadir iyo masuuliyiin kale.
Guddiga doorashadda oo ka koobnaa 8-xubnood isla markasna uu gudoomiye u ahaa Axmed Muuse Cali (Jookar) ayaa ku dhawaaqay natiijada doorashada, waxayna sheegeen inay u dhacday hab xalaal ah oo aan muran iyo buuq ku jirin.
Gudoomiyaha ururka Maahir Jaamaac Aadan oo ahaa Agaasimaha Shirkadda Filimaanta duubta ee Koor Filims iyo Xoghyaha Macalimuu oo khudbado jeediyay ayaa u mahad celiyay dhammaan wariyaashii doorashada ka qayb galay, waxay ballan qaadeen inay si dhab ah ugu addeegi doonaan wariyaasha ayna oofin doonaan wixii ay soo bandhigeen, sidoo kale waxay tilmaameen doorashadan inay cadeyn u tahay bisaylka ka muuqda wariyaasha iyo horumarka ay sameeyeen.
Xildhibaan Maxamed Cumar Dalxa oo ka mid ahaa masuuliyiinta madasha doorashada ka dhacdey joogay ayaa ammaanay habka wanaagsan ee doorashada loosoo agaasimey, waxa kale uu sheegay in wax badan ay is-badaleen marka loo eego hababkii hore ay saxaafadda Soomaaliya kusoo shaqaysey, wuxuu kula dardaarmay suxufiyiinta inay mar walba wanaaga iyo horumarka dalkooda xoogga saaraan.
Suxufiyiinta ayaa dhankooda sheegay inay ku faraxsan yihiin habka doorashadu u dhacdey waxyana sheegeen inay si wanaagsan ula shaqayn doonaan hoggaankooda cusub.
Sawiradda waxaa qaaday Cali Cabdi Ducale
PUNTLAND POST