Marwada koowaad ee Puntland Dr’s Hodon Siciid Ciise ayaa maanta Jaamacadda Bariga Afrika xarunteeda Boosaaso kaga qayb gashay munaasibad ay ku qalin jebinayeen dufcaddii labaad ee ka qalin jebisey kulliyadda Injineerinka (Civil Engineering) ee Jaamacadda Bariga Afrika.
Munaasabadda waxaa sidoo kale kasoo qayb galay Wasiirka Duulista Hawada ee dawladda Puntland, guddoomiyaha gobolka Bari, duqqa degmada Boosaaso, xubno ka socdey shirkadaha Isgaarsiinta, xubno ka socdey shirkadaha dhisma, odayaal dhaqameed iyo ardayda wax ka barata Jaamacadda bariga Afrika.
Marwada koowaad ee Puntland Dr’s Hodon Siciid Ciise oo munaasabadda khudbad ka jeedisey ayaa hambalyo u dirtay dhammaan ardaydii ka qalin jebisey kulliyada Injineerinka, isla markaana wax ay ku ammaantay dedaalka dheeraadka ah ee ay ku bixiyeen waxbarashadooda.
Sidoo kale Marwada koowaad ee Puntland oo ah macallimad muddo kusoo jirtey xirfadda macallinnimada ayaa ardayda uga sheekaysay qiimaha ay leedahay waxbarashadu iyo sida ay lagama maarmaanka u tahay in aan marnaba laga daalin waxbarashada.
Marwo Hodon ayaa hoga tusaalaysay fursadaha shaqo ee dalka ka jira balse aanay da’yarta waxbaratay ka faa’iideysan isla markaana waxay ku dhiirri gelisey dhallinyarada in ay dalkooda aaminaan ayna la yimaadaan hal-abuurnimo si’ay dalkooda u horumariyaaan.
Ugu dambayn, Marwo Hodon ayaa ka shirkadda CCECC oo ah shirkaddii dhistay garoonka Caalamiga ah ee Boosaaso waxay ka guddoontey qalab kala duwan oo isugu jira qalabka lagu baaro ciidda, dhagaxa iyo jayga oo ay shirkaddu ugu talo gashay in ay ardaydu ay ka faa’iidaystaan, qalabkaas oo Marwo Hodon ay ugu dambayn guddoon siisey Maamulka sare ee Jaamacadda Bariga Afrika.
—DHAMMAAD—
XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.
