Muqdisho(Puntland Post)-Raisul Wasaaraha Dawlada Federaalka ah ee Soomaaliya Cumar Cabdirashiid Cali Sharmake ayaa nabar xanuun badan ku tilmaamay boqolaalkii Dhaliyaradda Soomaaliyeed ahaa ee ku dhintay Badda u dhaxaysa Dalalka Masar iyo Talyaaniga.
Rasiul Wasaaraha ayaa sheegay inuu falkan si aada uga naxay, ugana damqaday, wuxuuna ka codsaday dhalinyaradda Soomaaliyeed inay joojiyaan tahriibka, kana faaidaystaan fursado Muhiim oo Dalka yaal.
Cumar ayaa xasuusiyey Dhalinta inuu Dalkoodu u baahan yahay maadama ay yihiin xoogii iyo Quruxdii umadda Soomaaliyeed, uuna Dalku tabaayo qof kasta oo dhalinyaro ah oo micno daro uga geeriyooda.
Raisul Wasaaraha ayaa dhan kale balan qaaday inay dhalinyaradda u abuuri doonaan fursado Waxbarasho iyo Shaqo si ay si wanaagsan uga faaidaystaan una joojiyaan safarka tahriibka ah ee aadka u khatarta badan.
Madaxda Soomaalida ayaa si aada loogu eedaynayaa inay ka gaabiyeen wax ka qabashada tahriibka, ayna iyagu sabab u yihiin inay Dhalinyaro badan Dalka iskaga tahriibaan, maadama Maamulada Dalka ay haraysay Cadaalad daro, Masumaaqsuq iyo Maamul xumo baahsan.
Puntland Post