Cadaado(Puntland Post)-Shalay galab dagaal ayaa ka dhacay Degmada Cadaado ee Gobalka Galgaduud, markii muran xoogan dhex maray Maleeshiyaad taabacsan Dadka qaadka keena Magaaladaas iyo Ciidamada Amaanka Dawlada Gobaleedka Galmudug oo iyagu bilihii u danbeeyey Gacanta ku hayey Cadaado.
Inkastoo aan naloo xaqiijin khasaare uu geystay dagaalka ka dhacay Cadaado hadana wararka aan ka helayno halkaas ayaa sheegaaya inuu iska hor imaadkani ka bilowday Garoonka Diyaaradaha Magaalada Cadaado.
Qof ku sugan Magaalada Cadaado ayaa iminka noo xaqiijiyey inay xaaladu degan tahay ayna amaanka Garoonka Diyaaradaha la wareegeen Ciidamada nabad sugida Dawlada Federaalka ah ee loo yaqaan NISA.
Wax garadka Cadaado ayaa dadaal ugu jira sidii loo xaqiijin lahaa amaanka Magaalada, loona kala qaadi lahaa labadda Ciidan.
Puntland Post