Ciidamada kala duwan ee Dawlada Puntland oo si aada u hubaysan ayaa isku gadaamay goobaha ay ku sugan yihiin kooxda lagu tuhunsan yahay Daacish ee ku sugan Gobalada Mudug iyo Nugaal.
Ciidamo si aada u hubaysan ayaa xalay saq dhexe gaaray degaanka Garmaal ee Bariga Gobalka Nugaal, waxaana kahor imaanshaha ciidamada degaankaas isaga baxay kooxdii maalin kahor degaanka soo gaartay iyagoo tagey halka loo yaqaan Suuj oo aan sidaa uga fogayn Garmaal hase ahaate Ciidamada ayaa bilaabay inay kooxdan dhinicyo badan ka hareereyaan si aysan ugu suura gelin inay helaan goob ay ka baxsadaan, Wuxuuna warkii ugu dambeeyey iminka sheegayaa inay fooda isdareen Ciidamada Puntland iyo Kooxda hubaysan uuna dagaal iminka ka socdo degaanka Suuj.
Dhinica Caduunka Gobalka Nugaal waxaa si lamid ah gaaray Ciidamo lixaad leh oo iyaguna bilaabay inay dhawr jiho kaga yimaadan kooxdan, walow illaa iminka aan lasoo sheegin talaabo si cad ay ciidamadu uga qaadeen kooxdan hubaysan waxaase xili walba la filan karaa talaabo ay ciidamadu qaadaan
Dhanka kale wararka aan ka helayno degaanka Suubaan oo katirsan Degmada Godobjiraan waxaa xalay halkaas lagu qabtay sadex gaari oo ah nooca loyaqaan Candha-baydlaha kuwaas oo lagu tuhunsan yahay inay gurmad u ahaayeen kooxdan, waxaase la shegayaa in raga gawaaridan wata ay ku doodayaan inay caws ka donayeen agagaarka degmada Godobjiraan.
Wixii soo kordha kala soco Puntland Post