Muqdisho (PP) ─ Dowladda Soomaaliya ayaa u yeertay in ku dhawaad 10 safiir oo Somalia u fadhiya Waddamada Dibadda Qaarkood inay si deg-deg ah ugu soo laabtaan dalka.
Wasaaradda Arrimaha Dibadda Somalia, ayaa Danjirayaashan ku amartay in ay deg-deg kusoo galaan dalka, iyagoo muddo 30 maalmood ah loo qabtay inay kusoo xaroodaan.
Qoshahan oo la sheegay inay isla og-yihiin madaxweyne Maxamed C/llaahi Farmaajo iyo Ra’iisal Wasaare Xasan Cali Kheyre, ayaa ujeedkeedu yahay in isbeddel lagu sameeyo safiirada in ka badan 4 sano xilka hayay.
Danjireyaasha loo yeeray inay dalka kusoo laabtaan ayaa waxay kala yihiin;
- C/raxmaan Cabdi Xuseen – Danjiraha Somalia ee Dalka Jabuuti
- C/qaadir Sheekheey Maxamed – Danjiraha Somalia ee Imaaraadka
- Yuusuf Xasan Ibraahim – Danjiraha Somalia ee Shiinaha
- Cabdulqaadir Sheekh Amiin Abuukar – Danjiraha Somalia ee Kuwait
- Cumar Sheekh Cali Idiris – Danjiraha Somalia ee Qatar
- Maxamed Cabdi Ugaas – Danjiraha Somalia ee Suudaan
- Sayid Axmed Sheekh Daahir – Danjiraha Somalia ee Uganda
- Maxamed Xasan Dawaare – Danjiraha Somalia ee Zambia
Ugu dambeyn, Wararka ayaa intaas ku daray in qaar ka mid ah danjirayasha loo yeeray ay si cad u Cambaareeyeen go’aankii ay Dowladda Soomaaliya ka qaadatay kiiskii sarkaalkii ONLF ee dhawaan loo gudbiyay dowladda Itoobiya Sida safiirka Somalia u fadhiya Dalka Qatar.
PUNTLAND POST