Garowe (Puntland Post):- Waxaa maanta laga furay magaalada Garowe shirkad balaaran oo ay ku midobeen xarumaha iibiya daawoyinka waxaana loogu wanqalay ama loo bixyey TAYO Pharmaceutical Wholesale Certificates oo soo dejin doonta Daawooyin sugan oo tayo leh.
Munaasabad lagu daahfurayo shirkadan waxaa kazoo qeyb galay masuliyiinta Shirkada TAYO, Dhakhaatiir, Masuuliyiin ka tirsan gollaha Xukuumada Puntland, Xildhibaano, Maamulka Degmada Garowe, Marti sharaf iyo Qeybo kala duwan oo ka tirsan bulshada ku nool magaalada Garowe.
Faysal Axmed Warsame oo ah gudoomiyaha guddiga sare ee shirkada TAYO ayaa faahfaahiyey sababta loo asaasay,wuxuuna ku dheeraaday ahmiyadda ay u leedahay dadku inay helaan daawo sugan oo la hubo tayadeeda,isagoona hoosta ka xariiqay inay ka bilaabeen hal abuurkan magaalada Garoowe , Islamarkaana ay wada gaarsiin doonaan dhamaan gobolladda Puntland.
Faysal Axmed ayaa sheegay in loogu soo hagaagi doono Shirkadda TAYO daawooyin wata cadeymahooda, Laguna kalsoonaan karo si looga hortago daawooyinka dhacay iyo kuwa ay liidato tayadoodu.
Cabdirashiid Maxamed oo ah madax hawlgelinta ee shirkadda Tayo ayaa isna sheegay in xarumaha tayo laga wada furay magaaloyinka waawayn ee Puntland,dhawaana ay xafiis ka furan doonaan magaalada Hargeysa, Wuxuuna ka sheekeeyay juhdiga iyo waqtiga ay ku bixiyeen asaasida iyo ka miro dhalinta daahfurka Shirkaddan cusub ee la magac baxday TAYO Pharmaceutical Wholesale Certificates.
Dakhaatiirta kala ah Dr Cabdulcasiis iyo Dr Cartan oo madashan ka hadlay ayaa soo dhaweeyey Shirkadda tayo, waxayna ku booriyeen in magaca ay wadato Shirkadda cusub iyo Shaqada ay u istaagtay laga dhabeeyo, Xilli ay tilmaameen dhakhaatiirtu inay wax badan kusoo kordhinayso nidaamka daawooyinka ee Puntland.
Xildhibaan Siciid Samatar Surcad ayaa isna dhankiisa sheegay in Barlamaanka Puntland dhawaan ay soo saari doonan sharciga lagula soconayo Caafimaadka, Islamarkaana lagu xakameyn doono dadka iyo cid kasta oo ku xadgudubta mihnada caafimaadka sida dhakhaatiirnimo iyo Shirkadaha dalka soo galiya Daawooyinka aan wanaagsanayn.
Wasiir kuxigeenka Wasaaradda hawlaha guud iyo gadiidka Puntland Cabdiraxmaan Yuusuf Faarax ayaa sheegay inay farxad u tahay in la asaaso shirkad ku taxaluqda arrimaha Dawoyinka oo ku sheegay inay tahay waxyabha ugu muhiimsan ee dadka u baahan yahay si loo helo daawo sugan.
Shirkaddan Tayo waxaa ku midoobay xarumo badan oo horey usoo dejin jiray iibinta Daawooyinka, Waana markii ugu horaysay oo samaystaan dallad balaaran oo ay ku midaysan yihiin, Islamarkaana damaanad qaadaysa sugnaanshaha iyo cadaymaha daawooyinka ay iibinayaan.
Abshir Dhiirane
PUNTLAND POST