Muqdisho(Puntland Today) Wasiirro,xildhibaano iyo saraakiil ka tirsan dowladda Federaalka Soomaaliya ayaa shalay kulan soo dhaweyn ah u sameeyay kooxda kubadda cagta Puntland iyo masuuliyiinta horkacaysa.
Kulankan oo qado ahaa waxaa kasoo qayb galay wasiirro uu ka mid yahay Cabdilaahi Axmed Jaamac (Ilko-jiir) wasiirka Cadaaladda, Cali Jaamac Jeengali wasiirka duulista hawada DFS iyo masuuliyiin kale, ahmihadiisana waxaa lagu sheegay inay tahay kulan dhiiri galin ah oo kooxaha la doonayo in loo qabto.
Agaasimaha guud ee wasaradda ciyaaraha Puntland Axmed Cabdalla Tigaana ayaa sheegay inuu ku faraxsan yahay soo dhawaynta ay ka helaan masuuliyiinta dowladda Soomaaliya ka tirsan, waxa kale uu sheegay inay tahay ahmiyadda halkan loo yimi sidii loo xaqiijin lahaa kor u qaadista xirfadda kubadda cagta iyo awooda ay ciyaartoyda Puntland u lee yihiin inay kasoo dhex muuqdaan ciyaaraha dalka.
Tigaana ayaa sheegay inay rajo weyn ka qabaan inay koobka mamulada dalka hantaan ayna awoodeeda lee yihiin, Tababaraha kooxda Puntland Maxamed Ciiro ayaa dhankiisa ka mahad celiyay soo dhaweynta ay ka heleen dowladda Soomaaliya.
Wasiiradda kulankan qabtay ayaa dhankooda sheegay inay muhiim tahay in mar kasta la xoojiyo Soomaalinimada iyo walaalnimada, waxa ay sheegeen kooxda Puntland inay tahay koox soo bandhigtay kubad wanaagsan si la mid ah sidey usoo bandhigeen kooxaha kale ee koobkan kasoo qayb galay.
Kooxda Puntland ayaa usoo baxday Sama-fiinaalaha koobkan, waxay Sabtida waxa dheelayaan xulka matalaya Hiiraan/Shabaalaha dhexe, sidoo kale waxaa isku aadey Banaadir iyo Jubbaland.
PUNTLAND POST