Madaxweynaha Dawladda Puntland Dr. Cabdiweli Maxamed Cali Gaas ayaa maanta 13 December 2016 xildhibaanada aqalka sare iyo kuwa aqalka hoose ee Puntland umetelaya baarlamaanka Soomaaliya gudoosiiyey shahaadada ansixinta xubinimadooda xildhibaan, isla markaana xalfad qado sharaf ah ugu qabtay xarunta dalxiiska Hidda-raac ee Garoowe.
Munaasibadan lagu gudoon siinaayey xildhibaanada shahaada ayaa waxaa madaxweynaha ku wehelinaayey masuuliyiin ka tirsan goloyaasha Dawladda Puntland, Gudoomiyaha baarlamaanka Puntland iyo ku xigeenadiisa, guddiga doorashooyinka heer fadaraal, guddiga doorashooyinka Puntland, maamulka gobolka Nugaal, maamulka degmada Garoowe, saraakiil ka tirsan ciidamada Puntland iyo saraakiil kamida Madaxtooyada Dawladda Puntland.
Ugu horayn Madaxweynaha Dawladda Puntland ayaa la dardaarmay Xildhibaanada aqalka sare iyo kuwa aqalka hoose ee Puntland u metelaya Baarlamaanka Soomaliya waxana uu mdaxweynuhu ku booriyey xildhibaanada inay ahaadaan kuwo ka shaqeeya horumarka Soomaaliya, isla markaana masuuliyad gaara iska saaraan shaqada baaxada leh ee ay uqaban doonaan Shacabkooda.
‘‘Hawshan maanta meeshan ka dhacday runtii dedaaldheer ayaa galay juhdi dheer ayaa galay fikir dheer ayaa galay, gobolada in la aado oo wax lagu soo doorto waxay ahayd fikir kamiyi Puntland, si salimana waa ay noogu raceen dhamaan masuuliyinta maamul goboleedyada dalku, sababtoo ah fikirkii saxda ahaa buu ahaa, waxaan idinkula dardaar mayaa inaad ka shaqaysaan horumarka dalkiina iyo shacabka idin doortay’’ ayuu yiri Madaxweynaha Dawladda Puntland Dr. Cabdiweli Maxamed Cali Gaas
Sidoo kale maxweynaha ayaa ku amaanay ugana mahad celiyey Baarlamaanka Puntland, Gudiga doorashooyinka heer Puntland , guddigadoorashooyinka Soomaaliya, ciidamada amaanka Puntland dedaalka iyo shaqada aan hakadka lahayn ee ay ugaleen sidii ay u qabsoomi lahayd doorashadu.
Dhinaca kale gudoomiyaha baarlamaanka Puntland mudanae Axmed Cali Xaashi ayaa isaguna dhankiisa kula dardaarmay xildhibaanada inay markasta ka shaqeeyaan horumarka shacabkooda iyo sidii ay dalkooda ugu horseedi lahaayen waxkastoo dan u ah.
Gudiga doorashooyinka Soomaaliya iyo gudiga doorashooyinka heer Puntland oo iyaguna madasha hadalo kooban ka jeediyey ayaa sheegay in doorashadu u dhacday ka dhacday sidii loogu tala galay, islamarkaana tibaaxay xildhibanada soobaxay in ay yihiin kuwo ku haboon xubinimadan loo doortay.
Ugu danbayn Madaxweynaha Dawladda Puntland Dr. Cabdiweli Maxamed Cali Gaas ayaa hanbalyo udiray Xildhibaanada ku guulaystey ka mid noqoshada baarlamanka Soomaaliya, waxaana uu ku booriyey inay markasta u adeegaan ka shaqaynta danaha Shacabka Soomaaliyeed.
–DHAMMAAD—
XAFIISKA WARFAAFINTA WACYI-GELINTA, HIDAHA IYO DHAQANKA EE MADAXTOOYADA DAWLADDA PUNTLAND.