Dowladda Federaalka Soomaaliya ayaa sheegtay in ciidanka badda Turkiga oo iskaashi la sameeyay ciidanka xoogga dalka ay soo furteen markabka MV Lutuf oo koox burcad-badeed ah ku haysatay deegaanka Jiifle ee gobolka Nugaal.
Dowladda Federaalka waxay sheegtay in howlgalka markabka lagu soo furtay oo socday 10 maalmood lagu dilay 14 ka mid ah Burcad-badeedda, islamarkaana lagu burburiyay afar doonyood.
Warkan ayaa lagu shaaciyay war-saxaafadeed goordhaweyd ka soo baxay wasaaradda gaashaandhigga Soomaaliya, waxaana intaas lagu daray in ciidamada ay si buuxda ula wareegeen markabka oo hadda si nabad ah u sii wata socdaalkiisa.
Wasaaradda gaashaandhigga Soomaaliya waxay digniin u dirtay kooxo ay sheegtay in ay siyaabo kala duwan u taageeraan Burcad-badeedda, kuwaas oo ay tilmaantay in sharciga la horkeeni doono.
PUNTLAND POST