Puntland ayaa si adag uga hadashay dhaqdhaqaaqyada dagaal ee kooxda Alshabaab muddooyinkii danbe ka bilowday degaamo ka tirsan gobollada Shabeelooyinka ee deriska la ah magaalada Muqdisho, kadib markii ay dib u qabsadeen degaanno badan oo laga saaray sannadkii 2022.
Madaxweyne ku-xigeenka Puntland Ilyaas Cismaan Lugatoor oo la hadlayey boqolaal kamid ah shacabka Garoowe oo taageero u muujinayey ciidanka dagaalka kula jira argagixisada Daacish, ayaa xusay in Alshabaab ay isku dayayso qabsashada Muqdisho, wuxuuna madaxweynaha Soomaaliya ugu baaqay inuu ku fara-adaygo caasimadda.
“Waan ka xunnahay in labadii kantarool ee Afgooye iyo Bal-cad ay Shabaab iyo xagjir joogaan, waan ka xunnahay laakiin maanta wax matari karno, waxaanna leenahay dowladda Soomaaliyeed ku mashquul cadawga dalkii qaybo kamid ah qabsaday inaysan Caasimadda qabsan”,ayuu yiri Madaxweyne ku xigeenka Puntland Ilyaas Cismaan Lugatoor.
Dhinaca kale, Madaxweyne Ku xigeenka Puntland ayaa xusay in Argagixisadu meel walbo oo ay joogto ay tahay in lala dagaalamo oo la ciribtiro, isagoo sheegay in hadda dowladda Puntland masuuliyada koowaad ee saaran ay tahay marka hore in Argagixisada ka ciribtirto dhulka Puntland oo dhan.
PUNTLAND POST
You must be logged in to post a comment.