Ugu yaraan laba ruux ayaa ku geeriyooday halka lix kalena ku dhaawacmeen iska hor-imaad hubaysan oo saaka ka dhacay kantaroolka bari ee magaalada Garoowe, kaasi oo dhexmaray ciidanka Booliska iyo askar ka tirsan ciidanka PSF oo ka yimid gobolka Bari.
Iska hor-imaadka labada dhinac ayaa sida wararku sheegayaan bilowday, kaddib markii ciidan boolis ah oo ku sugan kantaroolka bari ee caasimadda Garoowe ay is hor-taag ku sameeyeen laba gaari oo ay saarnaayeen askar ka tirsan PSF, kuwaasi oo ka yimid gobolka Bari kuna sii jeeday dhanka gobolka Mudug.
Dhaawacyada labada dhinac oo dhammaantood la geeyay isbitaalka Qaran ee magaalada Garoowe ayaa waxa ku jira Taliyihii garoonka diyaaradaha Garoowe G/sare Axmed Cabdi Xirsi (Jeego), halkaasi oo lagula tacaalayo xaaladooda, waxaana la sheegay in dhaawacyada qaarkood culus yihiin.
Sarkaal ka tirsan Booliska oo aan la hadalnay ayaa sidoo kale xaqiijiyay in ay gacanta ku hayaan afar maxbuus oo kamid ah ciidanka PSF iyo labadii baabuur, waxaana uu sheegay in raggan lagu daba-socday baabuur (Bas) ah ay ka dhaceen mas’uul dowladeed oo ku sugan Boosaaso, balse faahfaahin intaasi dheer ma bixin.
Dhinaca kale, weli ma jiro war rasmi ah oo dowladda ka soo baxay, kaasi oo ku saabsan dhacdadani khasaaraha dhimashada iyo dhaawaca sababtay, halka sidoo kale dhanka PSF aysan weli ka hadlin arrintaasi.
PUNTLAND POST
You must be logged in to post a comment.