Wasiirka Warfaafinta Puntland, Maxamuud Caydiid Dirir oo hadal ka jeediyay shir ku saabsan Technology-yada oo maanta ka furmay Boosaaso ayaa sheegay in ciidamada Puntland dagaal adag kula jiraan argagixiso Caalami ah oo adeegsanaysa qalab iyo farsamo ku dhisan Tiknooliji.
Wasiir Maxamuud Caydiid Dirir ayaa sheegay in ciidamada difaaca Puntland naftooda u hibeeyeen in ay Gacanka Cadmeed iyo shucuubta ku dhaqan Geeska Afrika ka difaacaan argagixiso Caalami ah oo isaga yimid dunida daafaheeda, islamarkaana adeegsanaya qalab casri ah, oo ay ku jiraan diyaarado qaraxyo xambaarsan iyo ookiyaalaha habeenkii lagu dagaallamo.
“Ciidamada difaaca Puntland waxay naftooda u hibeeyeen in ay Gacanka Cadmeed iyo Shucuubta ku dhaqan Geeska Afrika ka difaacaan Argagixiso Caalami ah oo dunida laga soo waariday, oo ay ku jiraan kuwii lagaga soo adkaaday Shaam iyo Waqooyiga Afrika, meelaha ay ugu galeenna xitaa daanyeerku naftiisa kuma aamino; iska daa askari qori sita oo cadow iska ilaalinayee” ayuu yiri wasiir Caydiid Dirir.
“Ciidamadeenna waxaa lagu la dagaallamayaa waa High-teck waana diyaarado qaraxyo xambaarsan oo askariga iyo gaadiidka dusha kaga imaanaya iyo farsamooyin casri ah. Dagaalkaasi Puntland iyo Ukraine maahee meel kale adduunka kama socdo, marka dhalinyarada, waxaan ka rabnaa iqtiraacii (hal abuurkii) waxaasi lagaga hortegi lahaa” ayuu sii raaciyay wasiir Dirir.
Hadalka wasiirka ayaa imaanaya, iyadoo tan iyo markii dagaalka Calmiskaad bilowday ay Ciidamada Puntland soo rideen in ka badan 80 diyaaradaha yaryar ah oo xambaarsan qaraxyo, kuwaasi oo qaarkood sababeen khasaare dhimasho iyo dhaawac leh kaddib markii ay ku qarxeen goobo ciidamadu hawlgallo ka samaynayeen.
PUNTLAND POST
You must be logged in to post a comment.