Khasaaro xoogan oo isugu jira dhimahso iyo dhaawac ayaa ka dhashay weerar gawaari laga soo buuxiyay wayaabaha qarxa loo adeegsaday iyo dagaal toos ah oo Al-shabaab saaka ku qaadeen saldhigyo ciidamada xooga dalka iyo kuwa deegaanku ku lahaayeen deegaanka Galcad ee gobolka Galgaduud.
Weerarkaas dadka ku dhintay waxaa ka mid ah Taliye ku-xigeenka ciidanka kumaandooska Danab Gaashaanle Xasan Maxamed Cismaan (Xasan Tuure) oo ka mid ahaa saraakiisha hoggaaminaysay howlgallada ciidamada kula jireen Al-shabaab.
Dowladda Federaalka Soomaaliya ayaa war ay soo saartay ku sheegtay in ay 100 ka tirsan Al-shabaab ku dishay weerarka, sidoo kalana ku gubtay gaadiid dagaal oo gaaraya ilaa shan gaari, kuna jiro mid ka mid ah gawaarida gaashaaman oo Al-shabaab ay xilli hore ku qabsatay dowladda.
Al-shabaab ayaa dhankooda sheegay in weerarkaas ku dileen askar badan oo uu ka mid yahay Taliye ku-xigeenka ciidanka kumaandooska Danab Xasan Tuure.
Deegaanka Galcad ee gobolka Galgaduud ayaa ka mid ahaa deegaanada ciidamada xooga dalka iyo kuwa deegaanka ay dhawaan kala wareegeen Al-shabaab.
PUNTLAND POST
You must be logged in to post a comment.