Yaa hubiya tayada daawooyinka la keeno Puntland?

**Qaar ka mid ah daawooyinka samayskoodu hooseeyo, sida ay Laanta Caafimaadka Adduunku sheegtay**

Garoowe (Wararka PP) — Ku dhowaad laba sano ka hor ayay Puntland Post soo saartay baaris ku saabsan sida loo iibiyo daawooyinka caabuqa bi’iya oo dadku u yaqaannaan qalajiye (antibiyootiko). Baarista waxaa lagu ogaaday in xiriirka la sheegay inuu ka dhexeeyo qaaxada aan laga bogsoon iyo iibinta antibiyootikada aan loo marin waddo sax ah uu jiro.

**Warbixintii Puntland Post ay Maarso 2021 ka qortay antibiyootikada farmashiyeyaasha Puntland iibiyaan warqad dhakhtar la’aan.**

**Wariye *Puntland Post* ka tirsan ayaa sanadkii hore antibiyootiko ka soo iibsaday dhowr farmashiye ku yaalla Garoowe warqad dhakhtar la’aan.**

Ilaa hadda Wasaaradda Caafimaadka Puntland dabagal kuma samaynin dhibaatadan caafimaad mana soo saarin tilmaamo lagu hagayo farmashiyeyaasha iibiya antibiyootikada warqad dhakhtar la’aan.

**WHO oo ka digtay tayo xumada daawooyinka halista ku ah caafimaadka carruurta Afrika.**

Sanadkan 69 carruur ayaa dalka Gaambiya ugu geeriyooday sharoobbo Shirkad Maraykan ah ay Hindiya ku samaysay oo ay cabeen awgeed. Afarta sharoobbo sababay geerida carruurta waa: Promethazine Oral Solution, Kofexmalin Baby Cough Syrup, Makoff Baby Cough Syrup, iyo Magrip N Cold Syrup. Laanta Caafimaadka Adduunka (WHO) ayaa sheegtay in afarta sharoobbo loo sameeyay heer aad uga hooseeya habka loo sameeyo daawooyinka loogu talagalay carruurta.

**Quartz Africa oo wax ka qortay daawooyinka iyo shirkadda ay dowladda Gaambiya tallaabada ka qaadday.**

Daawooyin Hindiya laga keenay ayaa lagu iibiyaa farmashiyeyaasha Puntland. Wasaaradda Caafimaadka Puntland iyo hay’adaha u xilsaaran dhowrista caafimaadka dadweynaha way ka gaabiyeen ku baraarujinta farmashiyeyaasha waajibka ka saaran iibinta daawooyin aan halisgalinaynin caafimaadka dadka.

Share this: