Xildhibaanno ka tirsan Aqalka Hoose ee Baarlamanka Federaalka Soomaaliya, ayaa xaqiijiyay geerida xildhibaan Aaden Xassan Cali (Aadan Moobleen), kaasi oo maalmihii u dambeeyay ku xanuunsanayey isbitaal ku yaalla magaalada Muqdisho.
Marxuumka geeriyooday, ayaa muddooyinkii u dambeeyay ku xanuunsanayey magaalada Muqdisho, waxaana xaaladdiisa caafimaad lagula tacaalayay isbitaalka Yardimeeli, Kadib markii uu haleelay xanuun dhanka kelyaha ah.
Sidoo kale, xildhibaanka ayaa horay ula xanuunsanaa cudurka Macaanka, waxaana uu maalmihii u dambeeyay ku jiray xaalad koomo ah, sida laga soo xigtay dhaqaatiirta isbitaalka.
Alle ha u naxariistee, xildhibaanku wuxuu kamid ahaa mudanayaasha Aqalka hoose ee Baarlamanka Soomaaliya ee laga soo doorto magaalada Jowhar ee Hirshabeelle, waxa uu haatan ahaa Xoghayaha Guddiga Maaliyadda ee Baarlamanka.
PUNTLAND POST