Madaxweynaha dowladda Federaalka Soomaaliya Maxamed Cabdullaahi Farmaajo ayaa Guddoomiyaha Gobolka Banaadir iyo Duqa Muqdisho u magacaabay Cumar Maxamuud Maxamed (Filish) oo ka mid ahaa hoggaamiye kooxeedyadii Muqdisho.
Qoraal ka soo baxay Madaxweyne Farmaajo ayaa lagu yiri “Anigoo xeerinaya baahida loo qabo in guddoomiye uu yeesho Maamulka Gobolka Banaadir, si loo sii amba qaado qorsheyaashii horumarineed ee socday, sidoo kalena tixgelinaya soo jeedinta kala duwan iyo waayo-aragnimada uu Mudane Cumar Maxamuud Maxamed (Filish) uu u leeyahay gudashada waajibadka xilkan ayaan ugu magacaabay.”
Madaxweyne Maxamed Cabdullaahi Farmaajo ayaa u rajeeyay Guddoomiyaha cusub ee Gobolka Banaadir ahna Duqa Muqdisho in uu Eebe u fududeeyo masuuliyadda culus ee loo igmaday, isagoona kula dardaarmay in uu si hufan oo daacadnimo iyo wadaniyad leh ugu adeego bulshadeenna.
Xeerkan Madaxweyne ee lagu magacaabay Guddoomiyaha cusub ee Gobolka Banaadir, ahna Duqa Muqdisho ayaa ku dhaqan galay saxiixa Madaxweynaha ee maanta oo ay taariikhduna ku beegan tahay Khamiis, 22-ka Ogoosto, 2019.
Cumar Filish ayaa bedelaya Allaha u naxariistee Eng. Yariisow oo lagu dilay qarax bishii la soo dhaafay ee July ka dhacay xarunta gobolka Banaadir.
Mudane Cumar Filish ayaa ahaan jiray hoggaamiye kooxeed caan ka ah Muqdisho, markii horena ka fallaagoobay Muuse Suudi Yalaxow.
PUNTLAND POST
You must be logged in to post a comment.