Madaxweynaha Puntland oo Garowe kusoo Laabtay, kuna soo dhoweeyey Guddoonka Baarlamaanka Labada Aqal ee DFS

Madaxweynaha Dawladda Puntland Dr. Cabdiweli Maxamed Cali Gaas ayaa maanta oo ay taariikhdu tahay 24 October 2017 dib ugu soo laabtay Garoowe, kuna soo dhoweeyey Guddoonka labada Aqal ee Baarlamaanka dawladda Fadaraalka Soomaaliya.

Madaxweynaha iyo Weftigiisa oo Jawhar kaga qayb galay xafladda caleema saarka Madaxweynaha Hir-shebelle  ayaa markii ay soo gadheen Garoowe waxaa kusoo dhoweeyey Guddoomiyaha golaha wakiilada dawladda Puntland Mudane. Axmed Cali Xaashi, masuuliyiin ka tirsan goleyaasha dawladda Puntland, saraakiisha ciidamada Puntland, saraakiil ka tirsan Madaxtooyada Puntland, nabadoono, waxgarad, siyaasiyiin, iyo boqolaal shacabka magaalada Garoowe.

Madaxweynaha dawladda Puntland oo hadal kusiiyey warbaahinta qasriga  Madaxtooyada Garoowe ayaa sheegay in ay shacabka reer Puntland iyo dawladdooduba ku faraxsan yihiin imaanshaha Puntland Guddoonka labada aqal ee Baarlamaanka Soomaaliya iyo masuuliyiinta kale ee wehelinayseyba, waxaana uu Madaxweynuhu xusay in ay berito oo ay taariikhdu tahay 25 October2017 ka qayb gelioonaan kal fadhiga 40-aad ee Golaha wakiilada dawladda Puntland.

“Sharaf weyn bay nootahay inay Puntland yimaadaan Guddoonka labada aqal ee Baarlamaanka Soomaaliya iyo masuuliyiinta kale ee wehelinayseyba ay beritona ka qayb galaan furitaanka kal fadhiga 40-aad ee golaha wakiillada dawladda Puntland, runtii waa markii ugu horeysey oo ay Puntland yimaadaan ka qayb galaan kal-fadhiga Baarlamaanka Puntland” ayuu yiri Madaxweynuhu.

“Waxay taasi ka turjumaysaa horumarinta fadaraaliisamka Soomaaliya ay qaadatay in Baarlamaanada dalku ay yeeshaan xidhiidh gaara, inay isasoo booqdaan, inay isu yimaadaan, inay wada shaqeeyaan, ka wada shaqeeyaan horumarinta iyo samaynta shuruucda dalka ay wax iskaga og yihiin waxa lawada-leeyahay oo Soomaali kawada dhexeeya inay noqoto ayaan rabnaa oo lawada shaqeeyo, kusoo dhowaada dalkiinii meel kale maydaan tegine Soomaaliya meel kamida oo laydin ka jecel yahay ayaad timaadeen “ ayuu yiri Madaxweynaha Puntland.

Sidoo kale Madaxweynaha dawladda Puntland ahna guddoomiyaha Golaha Iskaashiga dawladdaha Xubnaha ka ah DFS ayaa shaaciyey isagoo ku hadlaya afka golaha in ay aqbaleen gogosha wadatashi ee uu fidiyey Madaxweynaha dawladda Fadaraalka Soomaaliya Mudane. Maxamed Cabdullaahi Maxamed Farmaajo.

” Madaxweynaha dawladda Fadaraalka Soomaliya ayaa noosoo diray casuumad 28-ka bisha October 2017 inaanu  isugu nimaadno Xamar, waxaan rabaa inaan sheego anigoo ku hadlaya magaca dawladdaha xubnaha ka ah Dawladda Fadaraalka Soomaaliya inaan aqbalnay casumaaddaas kana qayb gelayno shirkaa isaga ah” ayuu yiri Madaxweynuhu.

Guddoomiya Golaha Wakiillada dawladda Puntland Mudane Axmed Cali Xaashi ayaa dhankiisa Puntland kusoo dhoweeyey masuuliyiinta labada aqal ee Baarlamaanka DFS, isgoona sidoo kale Guddoomiyuhu u xaqiijiyey Madaxweynaha Puntland Dr. Cabdiweli Maxamed Cali Gaas in dalku amni yahay, uuna ku faraxsan yahay in uu Madaxweynuhu soo laabtay dalkoo nabada iyo isagoo nabad ah.

Dhinaca kale Guddoomiyaha Baarlamaanka Soomaaliya, ahna kusimaha Madaxweynaha dawladda Fadaraalka Soomaaliya Mudane. Maxamed Cismaan Jawaari iyo Guddoomiyaha Aqalka Sare ee Baarlamaanka Soomaaliya Cabdi Xaashi Cabullaahi ayaa dhankooda ka mahad naqay soo dhoweynta balaadhan ee ay ku qaabileen shacabka magaalada Garoowe iyo masuuliyiinta dawladduba, waxaana ay tilmaameen in Puntland ku talaabsatay horumar lixaadle, Soomaaliya oo dhanna ay u tahay hormuud iyo tusaale dhaba isla markaana waxa ay si wada jira ugu baqeen in la ilaaliyo midnimada Soomaaliya.

=DHAMMAAD=

XAFIISKA, WARFAAFINTA, WACYI-GELINTA,  HIDDAHA IYO DHAQANKA EE MADAXTOOYADA DAWLADDA PUNTLAND.