Muqdisho(Puntland Post) Kooxda kubadda cagta Puntland ayaa lagu ammaanay qaab ciyaareedkii ay soo bandhigtey, kaddib kulan casho ah oo loogu qabtay xalay Hotelka Maka Al-mukarama ee magalada Muqdisho.
Munaasibadan waxaa soo qaban qaabiyay masuuliyiin uu ka mid yahya Axmed Macallin Fiqi oo ka tirsan xisbiga siyaasada Daljir oo xaruntiisu tahay magalada Muqdisho, sidoo kale munaasibada waxaa kasoo qayb galay gudoomiyaha gobalka Banaadir ahna duqa Muqdisho, saraakiil ciidan iyo masuuliyiin ciyaartooy.
Ahmiyadda kulankan ayaa ahayd in kooxda Puntland matalaysa loo sheego inay yihiin koox heer wanaagsan ka taagan ciyaaraha kubadda cagta iyo in la tuso in loo boggay waxay garoonka kubadda cagta Koonis kusoo bandhigeen.
Agaasimaha guud ee wasarada ciyaaraha Puntland Mudane Axmed Cabdalla Tigaane aya ka mahad celiyay kulankan cashada ah ee loo qabtay sidoo kale Tigaana wuxuu sheegay inay kooxdu dhinac kasta ka dhisan tahay ayna ka rajeynayaan in koobkan qaadaan oo ay geeyaan magalada Garowe, agaasimaha ayaa sidoo kale sheegay inay muhiim tahay in mar walba laga shaqeeyo is-dhexgalka dhalinyarada.
Mustafe Majacase oo ka tirsan xiriirka kubadda cagta Puntland ayaa dhankiisa sheegay ka xiriirr ahaan inay ku qanacsan yihiin sida loogu soo dhaweeyay magalada Muqdisho, waxa kale uu hadalkiisa raaciyay inay go’an tahay xilli kasta inay dhinac kasta wanaag ka muujiyan hadey noqon lahayd xagga ciyaarta,asluubta iyo dhaqanka.
Axmed Macallin Fiqi oo ka tirsan xisbi siyaasadeedka Daljir kana mid ahaa dadkii kulankan soo qaban qaabiyay ayaa ku ammaanay kooxda Puntland sida wanaagsan ee ay ciyaarta usoo bandhigeen, waxa kale uu goobta ka sheegay in Puntland ay tahay hooyadii Soomaaliya ayna wax kasta oo ay tabanayaan xagga ciyaarta raali galin laga bixinayo.
Fiqi iyo xisbigiisa Daljir ayaa kooxda kubadda cagta Puntland gudoon siiyay hadiyad ka kooban callanka Soomaaliya iyo maaliyad ay ku qoran tahay magaca Puntland, wuxuu sheegay inay jecel yihiin in ka xisbi ahaan ay Puntland yimaadaan xarumana ay ka furtaan.
Ugu danbeyntii gudoomiyaha gobalka Banaadir ahna duqa Muqdisho Yuusuf Xuseen Jimcaale ”Madaale” ayaa u mahad celiyay kooxda Puntland waxa kale uu sheegay inuu ku faraxsan yahay habka wanaagsan ee ay kubada usoo bandhigeen, wuxuu cadeeyay inuu taageersan yahay kooxda Puntland.
Kooxda Puntland ayaa Sabtida ciyaarta xiiso leh la qaadan doonta kooxda matalaysa Hiiraan/Shabeelaha dhexe, sidoo kale galabta oo Jimce ahna waxaa wada dheelaya kooxaha Banaadir iyo Jubbaland oo kii badiyaa usoo bixi doono Finaalaha koobka.
PUNTLAND POST