Bosaso(Puntland Post) Madaxwaynaha Puntland Cabdiweli Cali Gaas oo ay weheliyaan safiirka Talyaaniga ee Soomaaliya Amb.Fabrizio Marcelli iyo Xoghayaha guud ee urur gobaleedka IGAD Maxmuum Macalin ayaa saaka kormeer ku tagay dekadda magalada Bosaso ee xarunta Gobalka Bari.
Madaxwayne Gaas ayaa masuuliyiintani uga war bixiyay horumarka baaxada leh ee Puntland ka socda gaar ahaan dekada Bosaso oo ah goob aad u mashquul badan, waxayna soo arkeen gudaha dekadda iyo dekadda yarta ah ee loogu talo galay inay ka shaqaystaan Kalluumaysatada magalada.
Danjire Fabrizio Marcelli ayaa sheegay inuu ku faraxsan yahay inuu soo arko dekadda magalada Bosaso iyo goobo kale oo muhiim ah ka hor inta uusan ka dhoogin garoonka diyaaradaha magalada Bosaso, sidoo kale waxa uu sheegay dowladda Talyaaniga inay mar walba diyaar la tahay garab istaaga Soomaaliya gaar ahaan Puntland.
Xoghayaha IGAD Maxmuum Macalin ayaa dhankiisa sheegay Puntland oo qayb ka ah Soomaaliya inteeda kale ay gaartey horumar muuqda iyo kala danbeyn wuxuu aad ula yaabay sida ganacsiga iyo mashquulka u tahay magalada Bosaso.
Masuuliyiintan oo sidoo kale ka qayb galay xafladdii lagu shaacinayay dhismaha wajiga labaad ee garoonka diyaaradaha Bosaso ayaa ugu danbeyntii maanta u duulay magalada Nayroobi ee xarunta Kenya.
PUNTLAND POST