Garowe(Puntland Post)-Wasaaradda waxbarashada iyo tacliinta sare ee dowladda Puntland iyo Hay’adda cuntada aduunka ee WFP ayaa maanta si wadajir ah ufuray mashruuca quudinta ardayda dugsiyada hoose/dhexe ee Puntland, iyadoo WFP ay si rasmi ah u wareejisay qalabkii quudinta oo la gaarsiindoono dugsiyada loogu talo galay.
Agaasimaha guud ee wasaaradda waxbarashada Maxamed Cabdulqaadir Cusmaan ayaa la wareegay qalabkaan oo loogu talo galay in dugsiyada Nawaawi, Sheerbi, Kob-dhexaad, Xarfo, Widhwidh, Caroley iyo Siinaay loogu sameeyo barnaamijka quudinta.
Maxamed Cabulqaadir ayaa sheegay muhiimada laga leeyahay quudintaan inay tahay, in kor loosoo qaado heerka nafaqada ardayda dugsiyada hoose iyo dhexe si ay u noqdaan kuwo caaafimaadkooda wanaagsan yahay oo tamar u leh waxbarashadooda.
Masuuliyiinta waxbarashada iyo hay’adda WFP ayaa sida wadjair u sheegay in mashruucaan uu si toos ah mardhow u bilaabandoono islamarkaan waxay sheegeen in horey loo dhisay goobihii quudinta ardayda.
Dhinaca kale, agaasimaha wasaaradda waxbarashada ayaa kormeeray dugsiga sare Nawaawi halkaasi oo uu kula kulmay ardayda iyo maamulka dugsiga wuxuuna ka xog-waraystay heerkooda waxbarasho iyo udiyaar garowga imtixaanka sanad dugsiyeedka oo kowda bisha May la qabandoono.
Agaasimaha ayaa rajeeyay ardayda guul iyo mustaqbal wanaagan, wuxuuna kula dardaarmay inay ku dadaalaaan waxbarashadooda.
Bishii actobar ee sanadkii 2015, wasiirka waxbarashada dowladda Puntland Dr. Abshir Yuusuf Ciise ayaa dhagax dhigay mashruucaan.
