Garowe(Puntland Post) Baarlamaanka Puntland ayaa yeelanaya kulan aan caadi ahayn oo ku meel marinayo guddiga doorashooyink Puntland oo madaxwayne Gaas labo bilood ka hor magacaabay.
Gudoomiye ku xigeenka guddiga arrimaha gudaha iyo dowladda hoose Baarlamaanka Puntland Mudane Maxamed Axmed Jaceel ayaa isagoo la hadlayay maanta Radio Garowe waxa uu sheegay fadhigan inuu qabsoomaya 23-ka bishaan, kaasoo ahmiyadiisa kowaad uu yahay sida uu sheegay ansixinta guddiga doorashada oo aan weli shaqo bilaabin.
Xildhibaan Jaceel ayaa sidoo kale sheegay in looga wada hadlayo arrimo badan oo salka ku haya heshiiskii Puntland iyo dowladda Federaalku ku gaareen Garowe iyo war-murtiyeedkii kasoo baxay shirka madaxda ee Muqdisho.
Suurta galnimadda in khilaaf ka yimaado habka loo qaybinayo xubnaha Puntland kaga soo aaday aqalka sare ee Dowladda dhismaysa ayuu sheegay inay macquul tahay balse ka Baarlamaan ahaan inay dadaal u gali doonaan sidii cadaalad loogu samayn lahaa beelaha deggan Puntland.
PUNTLAND POST