Garowe (Puntland Post) Agaasimaha cusub ee wasaaradda deegaanka Puntland Muno Daahir Dalmar ayaa maanta la wareegtay xilka cusub ee lasoo magaacabay, waxayna xilka kala wareegtay agaasimihii hore Dr.Cabdirisaaq Bogcad oo loo badalay wasaradda Dastuurka balse ku dhawaaqay inuu xilka cusub iska casilay.
Wasiirka deegaanka iyo duurjoogta Dr. Cali Cabdulaahi Warsame, ku xigeenkiisa Faarax Cali Cabdi, wasiirka caafimaadka Dr. Cabdinaasir Cismaan Ciise Cuuke iyo mas’uuliyiin kale oo ka socday dowladda iyo hay’addaha la shaqeeya wasaaradda deegaanka. ayaa kasoo qayb galay munasibadda xil wareejinta.
Agaasimihii hore ee Deegaanka Dr. Cabdirisaaq Bog-cad ayaa sheegay wasaaradda deegaanku inay soo martay waqtiyo adag oo kala duwan, balse maanta ay kamid tahay wasaaraddaha ugu horeeya xaga maamul baahinta, isagoo sheegay inay xafiis shaqeynaya ku leedahay dhammaan gobolada Puntland, taasina wuxuu sheegayinay ku timid dadaal howlkarnimo ah oo ay ku tilaabsadeen madaxda wasaaradda iyo shaqaalaha.
Agaasimaha cusub ee wasaaradda deegaanka Muno Daahir Dalmar ayaa iyadana si weyn uga mahadcelisay soo dhowaynta ay kala kulantay madaxda wasaradda, waxayna sheegtay dadbadan inay ugusoo hambalyeeyeen shaqadaan cusub. Muno Dalmar waxay sheegtay inay qibradeeda iyo aqoonteeda shaqo kusoo kordhindoono wasaaradda deegaanka, balse waxay ka codsatay madaxda iyo shaqaalaha wasaaradda inay ku garabsiiyaan gudashada waajibaadkeeda shaqo.
Wasiirka deegaanka Puntland Dr. Cali Cabdulaahi Warsame ayaa sheegay inay soo dhoweynayaan kuna faraxsan yihiin agaasimaha csuub, wuxuuna ku tilmaamay inay tahay qof aqoonyahanad ah, meelo badan kasoo shaqeysay islamarkaana lehna qibrad shaqo. Dr. Cali Cabdulaahi Warsame wuxuu balanqaaday mas’uuliyiinta wasaaraddu inay agaasimaha cusub si wanaagsan ula shaqayndoonaan kuna garabsiindoonaan mas’uuliyadeeda shaqo.
Wasiirka caafimaadka ayaa sidoo kale u mahad celiyay agaasimihii hore ee wasaaradda deegaanka Dr. Cabdirisaaq Bog-cad, isagoo ku ammaanay inuu yahay nin shaqo yaqaan ah oo wax badan usoo qabtay wasaaradda deegaanka intii uu joogay.
