Qoryooleey-(Puntland Post)-Guddoomiyaha degmada Qoryooleey ee gobolka Shabeellada hoose Maxamed Xaaji Xuseen ayaa sheegay inuu maamulkooda isu soo dhiibay sarkaal ka tirsanaa Ururka Al-shabaab.
Ninkan oo xiriirro dhowr ah la sameeyay maamulka degmada ,ayaa waxaa magaciisa lagu sheegay Maxamed Xaaji Cali,ayaanan la ogeyn kaalinta uu u qaybsanaa dagaal yahannada Al-shabaab ee uu hore ugu tirsanaa.
Masuulkan ayaa intaa ku daray in hor-joogahan ay ku wareejiyeen gacanta ciidanka nabad-sugidda qaranka ee Muqdisho,si loogu sameeyo baaritaanno dheeri ah,isla markaana loola yeesho waraysiyo si looga helo xog badan.
Dowladda federaalka ayaa dhowr goor oo hore ku cel-celisay inay cafis u fidineyso malleeshiyaadka iyo saraakiisha kasoo goosta Al-shabaab ee si nabad ah isu dhiiba,waxaan tan iyo markii ay ka dhawaajisay ballanqaadyadaasi ka soo tagay horjoogayaal ay qaarkood lacago badan dul saarnaayeen xogtooda iyo dilkoodaba.