Bosaso- (Puntland Post) Diyaaradda Freedom Air oo siday Madaxwaynaha dowladda Federaalka Soomaaliya Mudane Xasan Shiikh Maxamuud iyo wafdi uu hoggaaminayo ayaa galinkii danbe ee maanta soo gaartay garoonka diyaaradaha magaalada Bosaso.
Madaxwaynaha Puntland, ku xigeenkiisa, Afhayeenka Baarlamaanka, gollayaasha kala duwan ee dowladda, masuuliyiin hore iyo dadwayne ku labisan calamada Puntland iyo Soomaaliya ayaa soo dhaweynta Xasan Shiikh Maxamuud ka soo qayb galay.
Madaxda ayaa salaan sharaf ka qaatay cutubyo ka mid ah ciidanka difaaca Puntland, ka dib waxay mid mid u gacan qaadeen dadkii kala duwanaa ee soo dhawaynta kasoo qayb galay.
Madaxwaynaha Soomaaliya Xasan Shiikh Maxamuud iyo madaxwaynaha Puntland ayaa warbaahinta kula hadlay guriga martida ee Airport-ka Bosaso, waxayna sheegen inay Puntland iyo dadka Soomaaliyeed maalmo muhiim ah u tahay dhismaha garoonka diyaaradaha magaalada Bosaso.
Xasan Shiikh Maxamuud, ayaa ka mahad celiyay habka wanagasan ee loogu soo dhaweeyay garoonka waxa kale uu sheegay inuu qayb ka yahay dhismaha garoonka horumarka dalka ka socda.
Madaxwayne Cabdiweli Maxamed Cali ayaa sheegay marka hore inay ku faraxsan yihiin imaanshaha madaxwayne Xasan Shiikh Maxamuud, waxa kale uu sheegay marka ay dhammaadaan munaasibadda Bosaso lagu qabanayo ay madaxdu ka wada hadli doonto arrimaha Soomaaliya.
Madaxwayne Xasan Shiikh Maxamuud waxaa magaalada Muqdisho ka soo qaaday diyaaradda Shirkadda Freedom Air oo isaga kala goosha Bariga Africa iyo Imaaraadka, waana nooceeda tii ugu weynayd Puntland ka soo degta.
Madaxda Shirkadda Freedom Air ayaa sheegay inay ku faraxsan yihiin diyaaradooda inay addeeg-sadaan madaxda Soomaalida.
Cali Cabdi Ducale
Puntlandpost.com
You must be logged in to post a comment.