RW Khayre oo ku laabtay Muqdisho kana War-bixiyay natiijada shirkii Lusaka

Muqdisho (PP) ─ Ra’iisul Wasaaraha Somalia, Xasan Cali Khayre oo maanta dib ugu soo laabtay dalka ayaa ka war-bixiyay shir madaxeedka waddamada ku bohoobay Suuqa Bariga iyo Koonfurta Afrika (COMESA) ee lagu qabtay magaalada Lusaka ee dalka Zambia.

Ra’iisul Wasaare Khayre ayaa sheegay in xubinnimada Somalia ee COMESA ay ka qeyb gaadaneyso dib u dhiska dhaqaalaha, horumarinta dalka, maal-gashiga, shaqo abuurka, dhismaha wadooyinka iyo warshadaha, iyo horumarinta adeegyada bulshada oo dhan.

“Ku biiritaanka COMESA waa qeyb kamid ah shaqooyinka ugu waaweyn ee hadafyada dawladdu ay leedahay oo ah dib ula fal-gelidda hey’adaha noo sahlaya in aan dib u dhisno dhaqaalaheenna. Waxa ay cadaynesyaa horumarka iyo tillaabooyinka mugga leh ee dalkeennu sameynayo in naloo ogolaado Suuq ay ka ganacsadasaan in ka badan konton milyan dad tiradoodu gaareyso,” ayuu yiri Khayre.

Isagoo sii hadlaya ayuu mar kale  yiri. “Waxaan aad ugu hambalyaynayaa dadka Soomaaliyeed gaar ahaan ganacsatada oo arintaani ay fursad siineyso. Marka ay ganacsatadu fursad helaan waxaa fursad helaya dalkaan sababta oo ah qof waliba oo ganacsada ah oo bilaaba ganacsi waxa uu shaqaalaysiinayaa dad Soomaaliyeed waxa uu bixinayaa canshuur, canshuurtaas waxaa lagu daboolayaa adeegyada ay u baahantahay bulshadu.”

Ugu dambeyn, RW Khayre ayaa shalay magaalada Lusaka ee dalka Zambia ku saxiixay xubinnimada Soomaaliya ee suuqa Bariga iyo Koofurta Afrika, waxa ayna Soomaaliya noqotay dalka 21-aad ee xubin ka noqda Suuqaas oo ay ka gacansato in ka badan 50 milyan oo dad ah.

PUNTLAND POST